Тываның Баштыңы Владислав Ховалыг биле «Росчетки» ПАН-ның чиңгине директору Андрей Рюмин Москвага ужуражып, энергетика инфраструктуразын хөгжүдериниң, «Арыг агаар» федералдыг төлевилелге киржилгениң, регионга дыңзыг сооктар үезинде электри четкилериниң ажылдаарының дугайында чугаалашкан.
Январьда сооктар дыңзаанындан Тываның электри четкизинде чүък улгаткан. Энергетика ажылдакчылары гидрометеорология төвүнүң дыңнадыышкынының соонда, кезээде белен чоруктуң чурумунче кирген. Агаар-бойдус сооза-даа, электри хандырылгазында улуг үрелиишкиннер болбаан.
Онза болуушкуннарны болдурбазы-биле чогуур хемчеглерни алган. Ниитизи-биле 450 ажыг специалистерни (66 бригаданы) ажылдаткан. Септелге программазы езугаар кышка белеткел хемчеглерин үе шаанда дооскан. 2026 чылда «Росчетки» акшаландырыышкынын 10 хире хууга, азы 283 млн. рубльге көвүдедир деп планнаан.
«Кончуг соок үелерде электри четкизиниң турум ажылдаары – шупту албаннарның демниг ажылдаанының болгаш кышкы шыңгыы белеткенгениниң түңнели-дир. Регионнуң энергетиктиг айыыл чок чоруун хандырарынга «Росчетки» улуг үлүүн кииргенин бедии-биле үнелээр-дир бис. Тываның энергетика адырларын хөгжүдери дээрге, чүгле техниктиг айтырыглар эвес, а регионнуң экономиктиг өзүлдезиниң болгаш чоннуң амыдырал-чурталгазының шынарын экижидериниң үндезини-дир. Чаа энергетика оруктары үлетпүр болгаш социал төлевилелдериниң боттаныр аргаларын бээр» - деп, Владислав Ховалыг чугаалаан.
Андрей Рюмин «Росчетки» амгы айтырыгларны шиитпирлээри-биле чергелештир, алыс кедилиг төлевилелдер-биле ажылын ам-даа уламчылаарын демдеглээн. Эрткен чылын компания Тываның энергетика долгандырыының үш подстанциязын эде чаарткан соонда ажыдып, системаның бүзүрелдиг ажылдаарын бедиткен.
Чаарттынган объектилер төп болгаш мурнуу кожууннарның хөгжүлдезинге база Саян-Шушенск ГЭС-тен немелде күчү-күштү алырынга орукту ажыткан.
2026 чылда Тыва биле Хакасияның энергетика харылзаазын быжыглаары-биле, 220 кВ күчүлүг «Шушенская-опорная – Туран» чаа транзит шугумунче энергияны дамчыдары планнаттынган. Оон аңгыда, Россияда беш эң улуг чес курлавырының санынче кирип турар Ак-Суг чыдынынче электри энергиязын дамчыдар улуг шугумну тудар.
«Чөөн Сибирьниң энергетика инфраструктуразын хөгжүдери – «Росчетки» бөлүүнүң мурнады боттандырар айтырыгларының бирээзи. Улуг хемчээлдиг үлетпүр болгаш социал төлевилелдер боттанып турар Тываже улуг кичээнгейни салыр апаар бис. 2026 чылда ниити узуну 550 км ийи чаа энергетика шугумун ажыдар бис. Ол ышкаш «Туран» подстанциядан шапкын хөгжүп турар Кызыл агломерациязынче немелде күчү-күштү дамчыдар 100 км шугумну тудуп эгелээр бис» - деп, Андрей Рюмин чугаалаан.