Республиканың Баштыңы Владислав Ховалыг бодунуң Телеграм каналынга Крещение байырлалы-биле регионда православ чүдүкчүлерге байырны чедирген. Байыр чедириишкининде бо хүннүң онзагай сүлде-сүзүүнүң ужур-утказын айтып, Тываны хөй националдыг, хөй чүдүлгелиг регион деп онзалап демдеглээн.
Владислав Ховалыг республикада буддизм, хамнаашкын, христиан шажынчы ужур-чаңчылдарны эдерип, бот-боттарынга хүндүткелдиг болгаш эп найыралдыг эгин кожа чорууру ниитилелдиң ниити үнелиг чүүлдери болгаш күчү-күжү дээрзин сагындырган. Ооң чугаазы-биле алырга, шак-ла ындыг чаңгыс демниг чорук регионда тайбыңны болгаш эп-найыралды кадагалап арттырарынга салдарлыг.
Тываның Баштыңы бо чылын тургустунган агаар-бойдусче кичээнгейни углаан. ОБЯ-ның сүмелээни езугаар, Улуг-Хемниң дожу быжыкпаанындан, Крещениеде сугже киреринден ойталаар дугайында шиитпирни Кызылдың епархиязы деткээн.
«Бо улуг байырлалдың кол утказы бо ёзулалда эвес, а иштики сагыш-сеткилдиң чаартылгазында деп чүдүкчүлер билир. Ооң кол утказы – дуган-хүрээлерге эртер улуг номналдарда чыглып мөргүүрү турган болгаш болуп артар» - деп, Тываның Баштыңы чугаалаан.
Ол ышкаш байырлалдың мөргүлдеринче чүдүкчүлерни өг-бүлелери-биле кээринче чалап, республиканың чурттакчыларынга быжыг кадыкшылды, сагыш-сеткил демнештирилгезин, аал-оранынга эп-найыралды күзээн. Республиканың Националдар херектериниң талазы-биле агентилелиниң дыңнатканы-биле алырга, республиканың шупту хүрээлеринде муң-муң чүдүкчүлер байырлыг литургияларга болгаш Суг ыдыктаар ёзулалга киришкен.