РФ-тиң Истелге комитединиң Тыва Республика талазы-биле истелге эргелелиниң ажылдакчылары боттарының профессионал байырлалын демдеглээн. Ол хүн ведомствонуң төөгүзүнде онзагай болуушкунну демдеглеп турар: 2011 чылдың январь 15-те Россияның Президентизиниң чарлыы-биле Прокуратура чанында Истелге комитединиң баазазынга хамаарышпас федералдыг орган — онза нарын болгаш ниитилел ужур-дузалыг кеземче херектерин истээр Россия Федерациязының Истелге комитеди тургустунган.

Тываның Баштыңы Владислав Ховалыг ведомствонуң 15 чыл ою-биле Истелге комитединиң ажылдакчыларынга болгаш хоочуннарынга байырны чедирген. Истелге комитединиң ажылдакчыларының профессионал мергежилдии, шынчы чоруу, ажылынга бердингени хамаатыларның эргелерин болгаш хосталгаларын камгалап турар деп,  республика Баштыңы байыр чедириишкининде демдеглээн.

«Истелге комитеди эрткен чылдарда чурттуң корум-чурум камгалаар системазының кол звенозу кылдыр бодун бадыткаан. Силерниң ажылыңар чүгле албан хүлээлгелерин күүседиринде эвес, а хоойлуга болгаш Ада-чуртка шынчы бараалгал-дыр" - деп, Владислав Ховалыг демдеглээн.

Тываның Баштыңы Истелге комитеди Россияда хоойлу-дүрүмнүң бүзүрелдиг чөлеңгиижи бооп артканын демдеглээш, ажылдакчыларга быжыг кадыкшылды, чаа профессионал чедиишкиннерни, күштү, тура-сорукту күзээн.

Россия Федерациязының Истелге комитединиң Тыва Республика талазы-биле истелге эргелели Кызылда төп аппараттыг база Чадаана, Шагаан-Арыг дээн ышкаш республиканың хөй чурттакчылыг черлеринде кожууннар аразының истелге килдистерлиг. Истекчилер кем-херек үүлгедии-биле демисел айтырыгларын комплекстиг шиитпирлээри-биле республиканың өске-даа эрге-хоойлу камгалаар органнар, ол ышкаш күрүне болгаш тус черниң эрге-чагырга органнары-биле идепкейлиг кады ажылдап турар.