Россияның парлалга хүнүнде Тыва Республиканың Чазааның Даргазының оралакчызы Алексей Сазан-оол күүсекчи болгаш муниципалдыг эрге-чагырга органнарының парлалга албаннарының төлээлеринге информастыг хандырылга талазы-биле ак сеткилдиг болгаш оперативтиг ажылы дээш өөрүп четтириишкин бижиктерин байырлыг байдалга тывыскан.
Чазак Даргазының оралакчызы хемчегниң киржикчилеринге республика Баштыңы Владислав Ховалыгның өмүнээзинден байырны чедирип, информация адырының күрүне программалары болгаш төлевилелдерни, хөй-ниити хемчеглерин база амгы үеде оперативтиг байдалдың дугайында медээлерни чонга үе шаанда дамчыткан демниг ажылын демдеглээн.
Чазак Даргазының оралакчызы 2025 чылда профессионал ажыл-чорудулгазынга ак сеткилдиг болгаш харыысалгалыг ажылы-биле шылгараан он специалиске өөрүп четтириишкин бижиктерин тывыскан.
Күүсекчи эрге-чагырга органнарының специалистеринден Айза Ховалыг (ТР-ниң Көдээ ажыл-агый болгаш аъш-чем яамызы), Долума Биче-оол (ТР-ниң Одалга болгаш энергетика яамызы), Сай-Даш Монгуш (ТР-ниң Күрүнениң туризм комитеди), Саяна Ондар ((ТР-ниң күрүнениң чуртталга инспециязы болгаш тудуг хайгаарал албаны), Чайзат Чылбак-оол (ТР-ниң Чуртталга-коммунал ажыл-агый яамызы) мактал бижиктерге төлептиг болган.
Тус чер бот-башкарылга органнарының парлалга албаннарындан Анель Кара-Сал (Ак-Довурак хоорай чагыргазы), Алёна Кунгаа (Тес-Хем кожуун), Долаана Куулар (Чеди-Хөл кожуун), Айкуш Ондар (Чөөн-Хемчик кожуун), Евгения Соянова (Барыын-Хемчик кожуун) ажылынга шылгарааннар.