Девискээрлер хөгжүлдезиниң фондузунуң деткимчези-биле Тыва Республикада коммунал инфраструктура эде чаартылгазының программазы доозулган. Региондан программаже кирген ниитизи-биле 6,9 километр шөйлү берген инженер четкилериниң сөөлгү беш участогун ажыглалче киирген.
Шагаан-Арыг хоорайда коммуналдыг эде чаартылга ажылдары доозулган. Муниципалитеттиң Гагарин, Новоселов, Пушкин кудумчуларында соок суг хандырар бир километр ажыг четкизинде капитал септелгени дооскан. Ол ышкаш Дружба, Гагарин, Новоселов, Солнечная, Саян-Шушенская кудумчуларында чылыг четкизиниң ниити узуну 5,8 километр дөрт участокту база чаарткан.
Ол программа күүселдези-биле Тывада ниитизи-биле 10,2 километр чылыг болгаш суг хандырылгазының инженер четкилери чаартынган. Ак-Довурак хоорайның коммунал инфраструктуразын база чаарткан. Чуртталга-коммунал ажыл-агый системазында айыыл-халаптарның ниити деңнели 9,2 хуу чедир эвээжээн, азы 3000 ажыг кижиниң амыдырал-чуртталга байдалын экижиткен.
Россияның Президентизиниң даалгазы-биле эгелээн коммуналдыг инфраструктураны эде чаартыр федералдыг программага киришкен баштайгы 14 регионнуң бирээзи Тыва болганын сагындыраал. 2023- 2027 чылдарда көрдүнген программа боттандырылгазы-биле кварталдар иштинде дамчыдылга четкилерин, ол ышкаш кол хоорзаларны солуур. Ол программаның оператору - «Девискээрлер хөгжүлдезиниң фондузу» болза, ону Россияның Тудуг болгаш чуртталга-коммунал ажыл-агый яамызы удуртуп турар.