Россияның парлалга хүнүнде Тываның Баштыңы Владислав Ховалыг регионнуң аныяк салгалының журналистериниң төлээлери-биле ужуражылганы эрттирген. Массалыг информация чепсектериниң төлээлериботтарның профессионал байырлалының хүнүнде эрткен ужуражылга үезинде политика, экономика, социал хөгжүлде, өөредилгениң чугула айтырыгларын республика баштыңы-биле кады сайгарган.
«Оларның мергежилинге сонуургалын база сеткилинден хандыкшылын кайгадым – үр эвес ажылдаан-даа болза, езулуг журналисчи көрүш бары оларның арын-шырайындан-на көскү болду» - деп, бир дугаар келген специалистер база аныяк салгал-биле ужурашкан соонда Владислав Ховалыг бодалы-биле үлешкен.
Ужуражылга үезинде, Президент Владимир Путинниң деткимчезин алган делегей чергелиг буддийжи форумче онза кичээнгейни углаан. Республиканың кожууннары катап тургузар буддийжи объектилерниң даңзызын тургузуп, тускай каталогче киирер ажылды эгелей берген. Форумнуң кол хемчеглери Тываның төвү Кызылга эртер болганда, Кызыл хоорайның чаа мэри Айдын Сарыглар-биле боттуг кады белеткелди болгаш дугуржулганы негеп турар. Мооң мурнунда Күрүне Думазының депутады албан-дужаалга ажылдап чораан чаа удуртукчунуң арга-дуржулгазын Тываның Баштыңы демдеглээн.
Тываның Баштыңынга салган айтырыгларның аразында аныяктарга чурттаар оран-сава байдалын экижидериниң дугайында тема база кирген. Владислав Ховалыг өөредилге болгаш медицина адырында аныяк специалистерни деткээн хемчеглер, ооң иштинде албан чери чурттар чер-биле хандырарын сагындырып, ол ышкаш Ак-Суг база Тастыг чыдыннарында ажылдап турар улуг инвесторлар-биле кады ажылдажылга планнарын таныштырган.
Келир үениң специалистерин деткиириниң аргазы кылдыр чурттаар чер садып алырынга эгеки дадывырны бээриниң аргазын өөренип көөрүн улуг ажыл берикчилери-биле чугаалажыр ажылды чазак чорудар деп турарын Тываның Баштыңы дыңнаткан.
«Аныяк өг-бүле бүрүзү чиигелделиг ипотека алыр дээш, баштайгы төлевирни боттары төлеп шыдавазы билдингир» - деп, Владислав Ховалыг тайылбырлаан.
Ужуражылганың ийиги кезээнде аныяк парлалга ажылдакчылары регионнуң бирги удуртукчузу Тываның медээлерин кайыын ап турарын, ол ышкаш хууда сонуургаан айтырыгларын республика баштыңынга салган. Владислав Ховалыг хүннүң-не эртенги болгаш кежээки телемедээлерни көөрүн кызыдып турарын үлешкен.
Тываның Баштыңы ужуражылганың төнчүзүнде аныяк журналистерге улуг чүткүл-сорукту, профессионал дидим чорукту, ажылынга шынчы чорукту база быжыг кадыкшылды күзээн.