Тываның Чазаанга Россияның парлалга хүнүн демдеглеп, күрүне шаңналдарын тыпсып езулал болуп эрткен. Республиканың Баштыңы Владислав Ховалыг массалыг информация чепсектериниң болгаш парлалганың төлептиг ажылдакчыларынга шаңналдарны тывыскан.
Владислав Ховалыг хемчегниң киржикчилеринге профессионал байырлалы - Россияның парлалга хүнү-биле байыр чедиргеш, информастыг технологиялар тергииделиниң үезинде социал четкилерде боду арынныг кандыг-даа кижи информация шөлүнүң идепкейлиг киржикчизи апарганда, журналистер болгаш парлалга ажылдакчыларының профессионал ниитилели-биле ужуражыры улуг уткалыг дээрзин демдеглээн.
Владислав Ховалыг эрткен чылда Улуг Тиилелгениң 80 чылын демдеглеп, Ада-чурттуң камгалакчыларынга тураскааткан информастыг ажылды чорутканы дээш, журналистер ниитилелинге четтиргенин илереткен. Массалыг информация чепсектеринге Шумов алышкыларга тураскаалды, тускай шериг операциязының киржикчилеринге мемориал комплекизин, «Тиилелге» спорт-культура төвүн ажытканы дээн ышкаш, онзагай болуушкуннарны чырытканы республиканың төөгүзүнче кирген.
«Силерниң ажылыңарның ачызында Тиилелгениң ады-биле чонну эвилелдээн, төөгүнү уламчылаан, Ада-чурттуң Улуг дайынының база бөгүнгү маадырларның маадырлыг чоруу дээш өөрүп четтириишкинниң хүрээлели тургустунган» - деп, Баштың чугаалаан.
Чон биле эрге-чагырга органнарының аразында бүзүрелдиг харылзааны тургузуп турар муниципалдыг МИЧ-терниң болгаш аңгы-аңгы ведомстволарның парлалга албаннарының ажылдакчыларынга Владислав Ховалыг өөрүп четтиргенин база илереткен. Республика Баштыңының чугаазы-биле алырга, оларның башкарганы күрүнениң хөй-ниити арыннары амгы үеде информацияны дамчыдар чугула шөлдер апарган.
Владислав Ховалыг чылдың-на тыпсып турары Тываның Баштыңының грантызы-биле МИЧ-терни база парлалга ажыл-чорудулгазын, ооң иштинде ниитилел ужур-уткалыг улуг медиа-төлевилелдерниң авторларын деткииринге беленин дыңнаткан. Бо чылын грантыны чаалап алыры-биле ээлчеглиг мөөрейге киржиринче хемчегниң киржикчилерин кыйгырган.
Регионалдыг телевидениениң болгаш массалыг информация парлалга чепсектериниң төлээлеринге профессионал байырлалынга тураскаадып күрүне шаңналдарын тывыскан.
Тыва Республиканың Баштыңының Өөрүп четтириишкин бижиин парлалга болгаш массалыг информация чепсектериниң четкизин хөгжүдеринге үлүг-хуузу болгаш ак сеткилдиг күш-ажылы дээш «Бүгү-российжи күрүнениң телерадиодамчыдылга компаниязы» ФКУБ филиалы - «Тыва» күрүнениң телерадиодамчыдылга компаниязының 1 категорияның телеоператору Экер Орланович Донгакка база 1 категорияның корреспондентизи Саглай Александровна Сарыгларга тывыскан.
Тыва Республиканың Баштыңының Өөрүп четтириишкин бижиин телевидение болгаш радиодамчыдылга системазынга хөй чылдарда ак сеткилдиг ажылы дээш, Бүгү-российжи күрүнениң телерадиодамчыдылга компаниязы» ФКУБ-туң филиалы - «Тыва» күрүнениң телерадиодамчыдылга компаниязының автомобильдер септээр 6-гы разрядтың слесары Виталий Федорович Пичи-оолга база автотранспорт участогунуң начальниги Альберт Карын-оолович Таргынга тывыскан.
Ак сеткилдиг күш-ажылы болгаш парлалга болгаш массалыг информация чепсектериниң четкизин хөгжүлдезинге киирген үлүг-хуузу дээш, Тываның Баштыңының Хүндүлел бижиин: «Тыва Республиканың медицинаның информастыг-аналитика төвү» күрүнениң бюджеттиг кадык камгалал албан чериниң информастыг-эрге-хоойлу хандырылгазының талазы-биле директорунуң оралакчызы Чечена Бадыевна Булытова, Тыва Республиканың Баштыңының Администрациязының болгаш Тыва Республиканың Чазааның Аппарадының Информастыг политика департаментизиниң инспектору Виктория Викторовна Кондрашова, «Тувинская правда» солуннуң кол редактору Юлия Валерьевна Манчин-оол база «Тывамедиагрупп» үндүрүлге чери» Тыва Республиканың күрүнениң автономнуг албан чериниң фото-чурук, дизайн база корректура килдизиниң начальниги Алдынмаа Александровна Тюлюш олар алганнар.
Массалыг информация чепсектериниң хөгжүлдезинге киирген үлүг-хуузу болгаш хөй чылдарда ак сеткилдиг ажылы дээш «Тыва Республиканың алдарлыг ажылдакчызы» хүндүлүг атты күш-ажылдың хоочуну Валентина Шагдыровна Чамыянга база «Тывамедиагрупп» үндүрүлге чери» Тыва Республиканың күрүнениң автономнуг албан чериниң фото-чурук, дизайн болгаш корректура килдизиниң орус дыл талазы-биле улуг корректору Надежда Петровна Германга тывыскан.
Күрүне шаңналдарын тывыскан езулал соонда, киржикчилер республика Баштыңы-биле чурукка тырттырганнар.