Тыва Республикага дыштаныр узун дыштаныр хүннер оожум, кандыг-даа улуг болуушкуннар чок эрткенин регионнуң Баштыңы Владислав Ховалыг 2026 чылдың бирги аппарат хуралынга дыңнаткан. Эрге-чагырганың аңгы-аңгы деңнелдериниң төлээлериниң кады харылзаалыг ажылының түңнели ол болганын демдеглээн. Владислав Ховалыг удуртукчуларга чедимчелиг кады ажылдажылгазы дээш өөрүп четтиргенин илереткен.
ТР-ниң Чазааның Даргазының оралакчызы Орлан Сарыглар байырлалдарны организастыг болгаш айыыл чок эрттирер дээш кандыг ажылдар чорутканын регионнуң удуртукчузунга тодаргай таныштырган. Культурлуг дыштанылга болгаш спортчу шөлдерже, кафелер болгаш садыг-саарылга объектилеринче, ол ышкаш суг кыдыынче, октаттынган болгаш айыылдыг черлерже 6456 рейдилерни чоруткан. Социал айыылдыг байдалда өг-бүлелерни хүннүң-не хынап, 3300 ажыг үнүүшкүннү кылган. Ол хыналдаларның түңнелинде 60 назы четпээннерни социал дуза төптеринде чыттырган.
Байырлалдар хүннерде уругларга организастаан түр үениң дыштанылга төптери ажылдаан. 2025 чылдың Чаа чыл байырлалдарында республикада 250 ындыг төптер турган болза, бо чылын оларның саны 340 четкен. Түр үениң дыштанылга төптери эрткен чылга деңнээрге үш катап хөй - 18685 уругга дыштанылга хемчеглерин организастаан. Культура албан черлеринге, спорт школаларынга, «Эзирлер уяларынга», уругларның эгелээшкин төптеринге, немелде өөредилге албан черлеринге, социал деткимче төптеринге үш муң ажыг кижизидилге хемчеглери эрткен. Бии-Хем биле Тожу кожууннар эң хөй уругларны хаара туткан.
Муниципалитеттерде чурттакчы чонга байырлал хемчеглерин организастаар дээш ниитизи-биле 1900 ажыг хемчеглерни эрттирген, аңаа 100 муң хире кижи киришкен. Таңды, Чөөн-Хемчик, Каа-Хем кожууннарга культура-массалыг эң хөй хемчеглер болуп эрткен. Республика деңнелдиг эрткен 10 спортчу хемчегге 2400 хире кижи киришкен.
Декабрь төнчүзүнде байырлыы-биле ажыттынган «Победа» спорт-культура төвү республика чурттакчыларының ынак дыштаныр чери апарган.Ийи муң хире кижи келген, оларның бир муң хирези тренажер залынга, 350 кижи теннис залынга, 120 кижи бокс залынга белеткенген. «Субедей» универсалдыг спорт комплекизинге дөрт муң ажыг кижи дыштанган, оларның хөй кезии конькилиг чуңгулаан.
Тус чер бот-башкарылга органнары муниципалдыг тургузугларга доктаамал, демниг ажылды организастаан. ТР-ниң Чазааның Даргазының оралакчызы хүлээлгени күүседип турар Шолбан Сендаш харыысалгалыг кижилер хүннүң-не дежурныйлап, амыдырал-хандырылга объектилерин контрольдап, дүрген хөделир албан черлери болгаш корум-чурум камгалаар органнар-биле оперативтиг кады ажылдажылганы хандырганын дыңнаткан.
Чазак Даргазының оралакчылары болгаш күүсекчи эрге-чагырга органнарының удуртукчулары бадылаттынган график езугаар дыштаныр хүннерде муниципалдыг тургузугларже 63 үнүүшкүннү кылган. Чер-черлерде байдалже, тус чер бот-башкарылга органнары-биле кады ажылдажылгаже, ажыл-агый талазы-биле тургустунган айтырыгларны дүрген шиитпирлээринче онза кичээнгейни угландырган. Байырлалдың дыштанылга хүннеринде чоруткан ындыг үнүүшкүннер немелде контрольду болгаш демниг кады ажылдажылганы хандырган.