Барыын-Хемчик кожууннуң Аксы-Барлык суурда фельдшер-акушер пунктузунуң база Эрги-Барлык суурда эмчи амбулаториязының ажыдыышкыны байырлыг байдалга болуп эрткен. Тываның Баштыңы Владислав Ховалыг объектилерниң ажыттынганын дыңнадып тура, ылаңгыя көдээ суурларда кадык камгалал системазын хөгжүдери регион эрге-чагыргазының мурнады хөгжүдер сорулгазы болуп келген болгаш болуп артпышаан дээрзин онзалап демдеглээн.
«Объекти бүрүзү кадык камгалалының сөөлгү үениң технологиялары-биле бүрүн дериттинген, дүрген интернетте кожуп, чаңгыс аай чурагай системазынче кирген. Ынчангаш чурттакчыларга телемедицина консультацияларын болгаш эмчи шинчилелдериниң бирги чадазын ол-ла черге эртип алыр аргалыг апарган. Ынчалдыр республиканың чурттакчыларынга шынарлыг болгаш чедингирин эмчи дузазын чедип алыр аргалыг болган бис» - деп, Владислав Ховалыг бодунуң Телеграм каналынга дыңнаткан.
Республика Баштыңының даалгазы-биле Чазак Даргазының оралакчызы Орлан Сарыглар база кадык камгалал сайыды Анатолий Югай чаа ФАП болгаш эмчи амбулаториязының ажыттынганы-биле суур чурттакчыларынга байыр чедирер дээш келгеннер.
«Өзүп-төрүттүнериниң деңнелин бедидеринге идигни бээр херээженнерниң кадыын хайгаараар чаа эмнелге черлериниң ажыттынганы онза чугула» - деп, Орлан Сарыглар демдеглээн.
Аксы-Барлык суурда ФАП-та көдээ суурнуң фельдшери Шахзодахон Абдурасулова ийиги чыл ажылдап турар. Ол ажылдаан үезинде суурнуң шупту 1014 чурттакчылары-биле таныжып алган. Эрткен чылын Эрги-Барлыкка 6 чаш төрүттүнген болза, бо чылын ФАП ийи божуур иени хайгааралда алган.
Фельдшер Сайлык Куулар – Эрги-Барлыкта чаа эмнелге амбулаторияның эргелекчизи. Эмнелгеде 1053 чурттакчы быжыглаттынган, ооң иштинде 344 чаштар бар , оларның чедизи чаа-ла төрүттүнген. Эмнелгеде дөрт иштиг херээжен кижи бүрүткеттинген.
Чаа оран-савада автоматчыткан ажылчын олуттарны ажыдып, дүрген ажылдаар интернетте кошкан, телемедицина консультацияларын, бирги эмчи шинчилгезин, хоочураан аарыглыг аарыг кижилерни улаштыр хайгаараар, республиканың эмнелгелериниң специалистери-биле ырактан харылзажыр аргалар тургустунган.
«Узун болгаш идепкейлиг назын», «Өг-бүле» национал төлевилелдер езугаар Тывага 2025 чылда:
- 12 объектилер туттунган (10 фельдшер-акушер пунктузу болгаш ийи эмнелге амбулаториязы);
- кадык камгалалының беш албан черлеринге капитал септелгени кылган;
- кадык камгалалының бирги звенозунга 179, санныг эмчи дериг-херекселдерин, реабилитацияга 207, республиканың Перинаталдыг төвүнүң хереглелдеринге 153 санныг эмнелге дериг-херекселдерин алган;
- 46 автомобильдерни база көжүп чоруур ийи рентгенография биле маммографияны садып алган.