Православ шажынның чүдүкчүлери христиан эң улуг байырлалдарның бирээзи – Христостуң төрүттүнген хүнүн демдеглээн.

Республиканың Баштыңы Владислав Ховалыг республиканың чурттакчыларынга Христостуң төрүттүнгениниң чырыткылыг байырлалы-биле байырны чедирген.

Рождество байырлалы сагыш-сеткилди чылыг-чымчак, буянныг, идегел-биле долдуруп, чоок улузунга ынакшылды, кээргээчел чорукту болгаш өршээлди мөңге үнелиг чүүлдерни сөңнээр деп, ол демдеглээн. “Хөй националдыг бистиң республикавыста аңгы-аңгы культуралар, чүдүлгелер, чаңчылдар бистиң-биле кады чурттап чоруур. Төрээн чурттувустуң күжү болгаш чаңгыс деми аңгы-аңгы омак-сөөктүг чоннарның чүдүлгезин, чаңчылдарын, культуразын хүндүлээривисте» – деп, Тываның Баштыңы демдеглээш, республиканың чурттакчыларынга кадыкшылды, тайбыңны, байлакшылды күзээн.

Тываның шупту православ хүрээлеринге Рождество бүдүүзүнде байрылалдың номналдары болуп эрткен. Рождество эртенинде бурганның Литургиязы база болган.

Рождество дээрге чүдүкчүлерге үениң аайы-биле амыдыралын өскээр угаап көөрүнүң, энерел сеткил болгаш буянныг чорукче чүткүлдүң эгези-дир. Бо байырлалды делегейниң 100 ажыг чурттары күрүне деңнелинде демдеглеп турар. Тоолчургу чугаалардан алырга, Рождество бүдүүзүнде Вифлеемге кайгамчык чүүл болган: Бурганның Авазы Мария Бурган Төлү - Иисус Христосту божаан.

Христостуң төрүттүнген хүнү дөртен хонук үргүлчүлээн белеткелди база байырлаашкынны доозар. Байырлалдың номналының соонда, чүдүкчүлер эъттен болгаш далгандан кылган аъш-чемнер делгээн байырлыг шайлаашкынны эрттирер. Рождество соонда дораан-на Святки — байырлалды демдеглээн 12 ыдыктыг хүннер эгелээр.