Республиканың Өөредилге яамызының дыңнатканы-биле алырга, бо дыштанылга хүннеринде школачыларга эң хөй дыштанылга төптерин организастаан. Оларның саны 159 четкен. Оларның хөй кезии кижизидилге талазы-биле чөвүлекчилериниң эгелээшкини-биле школаларның баазазында ажыттынган чаа төптер болур. Ол төптерге уруглар боттарының чогаадыкчы чоруун, спортчу мергежилин сайзырадып, угаан-сайзырал оюннарынга киржир аргалыг.

Декабрьның 31-ден январь 11-ге чедир кышкы дыштанылга хүннеринде төптер ажылдаар. 18,5 муң ажыг уругларны хемчеглерге хаара тудар. Дыштанылга хүннеринде организастаан хемчеглер программазы эрткен чылдыындан дөрт катап хөй. Ол уругларга байырлалдарны ажыктыг эрттиреринге, чаа улдуңга белеткенип, салым-чаяанын ажыдып, чаа мергежилдерни чедип алырынга дузалаар.

Өөредилге черлериниң төлээлери мындыг хевирлиг дыштанылга уругларны чүгле хаара тударындан аңгыда, оларга бот-сайзыраар, бодалдарын боттандырар арганы берип, эш-өөрүнүң аразында солун кылдыр хөглеп, үшкү узун улдуң эгелээриниң мурнунда таптыг дыштанып алыр арганы бээр деп демдеглээн.

Декабрь 31-ден январь 11-ге чедир байырлалдың узун дыштаныр хүннеринде уругларның айыыл чок чоруун хандырар дээш, «Айыыл чок Чаа чыл» деп ведомстволар аразының профилактиктиг операциязы чорудуп турар. Ол үеде профилактика албан черлери социал айыылдыг өг-бүлелерже рейд үнүүшкүннерин организастап, элээдилерниң чурталп турар байдалын хынап, хөй кижилер чыылган черлерни хынаар.