Тываның Баштыңы болгаш республиканың Чазааның кежигүннери хөй-ниити ажылдакчызы, депутат, Кызыл хоорайның Төлээлекчилер хуралының чуртталга-коммунал ажыл-агыйының болгаш хөй-ниитиниң коммунал ажыл-агый, орук ажыл-агый болгаш транспорт талазы-биле комитеттиң даргазы Роман Сергеевич Поманисочкинниң элекке мөчээни-биле ооң өг-бүлезинге болгаш чоок улузунга кажыыдалын илереткен.
Кызыл хоорайның чурттакчызы Роман Сергевич бодунуң күш-ажылчы ажыл-чорудулгазын төрээн хоорайының чуртталга-коммунал ажыл-агыйын хөгжүдеринге тураскааткан.
Ол 2002 чылда «Водоканал» күрүнениң унитарлыг бүдүрүлгезинге таңныыл болуп эгелээш «Правобережный» участоктуң начальнигинге чедир депшип ажылдаан. Ооң бедик мергежили, ханы билиглери база шын шиитпир хүлээп билири - ооң коллегаларының болгаш удуртулгазының хүндүткелин чаалап алган.
Роман Сергеевич чурталгазының улуг кезиин ниитилел-политиктиг ажыл-чорудулгага тураскааткан. Кызыл хоорайның Төлээлекчилер хуралының депутады болуп ажылдааш, хоорайжыларның амыдырал-чуртталгазының, ооң иштинде чаагайжыдылга болгаш чуртталга-коммунал ажыл-агыйының шынарын бедидер дээш идепкейлиг ажылдап турган.
Роман Сергеевич хоорайның чугула комиссияларын удуртуп, социал болгаш инфраструктураның чугула төлевилелдерин боттандырарынга киржип, чоннуң социал камгалалы кошкак бөлүктеринге, инвалидтер болгаш өскүс уругларга дузаны көргүзүп чораан. Ол спорттуң аңгы-аңгы хевирлеринге киржип, чаңгыс чер чурттугларының аразында кадык амыдыралды идепкейлиг нептередип чораан.
Роман Сергеевич хоорайга болгаш республикага киирген ачы-хавыяазы дээш, «Кызыл хоорайның 100 чылы» юбилейлиг медальды, «Кызыл хоорайны хөгжүдеринге ачы-хавыяазы дээш» медальды, «Кызыл хоорайның хүндүлүг ажылдакчызы» деп атты база өске-даа шаңнал-макталдарны алган.