Херсон облазында Хорлы суурнуң тайбың чурттакчыларынче Украинаның чепсектиг күштериниң оор езу-биле халдаашкынының соонда, Тыва чогуур дузаны болгаш деткимчени көргүзеринге белен дээрзин, Владислав Ховалыг бодунуң Телеграм каналынга дыңнаткан. Украин дрон халдаашкынындан бир бичии уруг-биле кады санаарга 24 кижи өлген, 50 кижи кемдээн.
"Тываның хөй националдыг чону, бүгү Россия ышкаш, чок болган кижилерниң өг-бүлелери болгаш чоок улузу-биле кады качыгдап тур. Улуг кажыыдалга таварышкан өг-бүле бүрүзүнге сеткиливис ханызындан кажыыдалывысты илередип тур бис. Айыыл-халапка таварышкан кижилер дүрген сегип келзин дээш мөргүп тур бис. Тыва бо берге үеде чогуур дузаны болгаш деткимчени көргүзеринге белен. Бистиң күжүвүс болгаш деткимчевис – чаңгыс демивисте!" - деп, Тываның Баштыңы медеглээн.
Январь 1-ниң дүнезинде Кара далай эриинде Хорлы хоорайның чурттакчылары Чаа чылды уткуп, дыштанып турда, Украинаның чепсектиг күштериниң үш дроннары тускай халдаашккынны кылган. Областың губернатору Владимир Сальдонуң чугаазы-биле алырга, таптыг-ла дүн ортузунда, Чаа чыл үнүп турда ол болган.
Дроннарның бирээзи өрттендирер холумактыг чораанындан, частыышкындан кафеге өөскээн өрт үезинде хөй кижилер когараан.
РФ-тиң Истелге комитеди террорчу халдаашкынга хамаарыштыр кеземче херээн оттурган.
Херсон облазында январь 2 биле 3-те кажыыдал хүннери кылдыр чарлаттынган.