Чаа чылдың бүдүүзүнде, Кызыл хоорайга тускай шериг операциязының киржикчилериниң ажы-төлүнге болгаш оларның өг-бүлелеринге байырлал хемчээн организастаан. Тываның Баштыңы Владислав Ховалыг база «Ада-чурт камгалакчылары» фондунуң регионалдыг салбыры Чаа чыл программазын чылдың-на деткип эртип турар.
Тываның аңгы-аңгы кожууннарындан фондунуң программазын боттандырып турар социал координаторлар болгаш башкыларга үдеткен дыка хөй өг-бүлелер республиканың найысылалынга чыглып келген. В.Көк-оол аттыг Национал хөгжүм-шии театрының артистери аныяк көрүкчүлерге Чаа чылдың театржыткан көргүзүүн бараалгаткан. Салтан хаан дугайында тоолга үндезилеттинген оюн-көргүзүг-биле байырлал эгелээн. Фондунуң регионалдыг салбырының удуртукчузу Мерген Кызыл-оол оюн-тоглаа мурнунда Чаа чыл елказының киржикчилерге байырны чедирген.
«Чылдың-на бичии уругларга илби-шидилиг байырлалды организастаарын кызыдып чоруур бис. Республика Баштыңының, Дээди Хуралдың, муниципалдыг эрге-чагырга органнарының организастааны Чаа чыл хемчеглеринче уругларны чалаан бис. Чаа чылдың хемчеглеринге киржип шыдаваан уругларга «Соок-Ирейниң маршруду» деп акция-биле байыр чедириишкинин январь 10-га чедир уламчылаар бис» - деп, «Ада-чурттуң камгалакчылары» фондунуң салбырының удуртукчузу Мерген Кызыл-оол дыңнаткан.
Байырлалдың төнчүзүнде уруг бүрүзү Тываның Баштыңы Владислав Ховалыгдан белектерни алган. «Эльбрусметалл-Литий» компания байырлалды деткээн.