Владислав Ховалыг дүүн Кремльге Президент Владимир Путинниң удуртканы Күрүне чөвүлелиниң Россия Федерациязының экономиказынга кадрлар белеткээриниң айтырыгларын чугаалашкан хуралынга киришкен.
Күрүне Баштыңы хуралды ажыдып тура, 2026 чылды Россияның чоннарының чаңгыс деминиң чылы кылдыр чарлаан чарлыкка атты салганын дыңнаткан. Ол ышкаш Владимир Путин Россияның Күрүне Чөвүлелиниң 25 чыл ою-биле хуралдың киржикчилеринге байырны чедирген.
«Күрүне чөвүлелинге көөр кылдар киирген айтырыглар чуртка болгаш ооң хамаатыларынга кезээде херек, ужур-уткалыг. Мурнувуста салдынган айтырыгларны чедиишкинниг шиитпирлээринге күштү, тура-сорукту, кадыкшылды күзеп тур мен» - деп, Президент чугаалаан.
Тываның Баштыңы Владислав Ховалыгның бодалы-биле алырга, 2026 чылды Россияның чоннарының чаңгыс деминиң чылы кылдыр чарлааны, ылаңгыя тускай шериг операциязының үезинде дыка херек, шын болгаш чугула шиитпир.
Владимир Путин хуралдың кол темазын чарлап тура, бөгүнде чуртту хөгжүдеринге кол болгаш үндезин дөзү кадрларда деп демдеглээн. Президент бо чылын 19 национал төлевилел ажылдап эгелээнин, оларның сези Россияның технологтуг мурнакчы чоруун хандырарынче угланган дээрзин сагындырган.
Чурттакчы чонунуң ортумак назы-хары 30 харлыг аныяк Тыва Республикага кадрлар курлавырын өстүрериниң талазы-биле системалыг ажылдар чоруп турар.
Ылаңгыя «Аныяктар болгаш уруглар» национал төлевилелдиң составында «Профессионалитет» федералдыг төлевилел-биле Тывада тудуг, даг-болбаазырадылга, көдээ ажыл-агый талазы-биле үш кластер тургустунган. Федералдыг төлевилел езугаар Тываның агроүлетпүр техникумунда, Кызылдың тудуг техникумунда, Ак-Довурактың даг техникумунда өөредилге мастерскаялары болгаш материал-техниктиг комплекс чаарттынып турар.
Тываның агроүлетпүр техникуму көдээ ажыл-агый бүдүрүлгезиниң шынарын бедидеринче угланган амгы үениң технологияларын ажыглап турар.
Ак-Довурактың техникуму болгаш өске-даа четки техникумнары 2025/2026 өөредилге чылындан эгелеп даг-болбаазырадылга кластерлиг өөредилге программалары-биле ажылдап эгелээн. «Эльбрусметалл-Литий» КХН база «Тардан Голд» КХН, «Лунсин» КХН, «Тываның даг-руда компаниязы» КХН даг-болбаазырадылга компаниялары экономиканың боттуг секторунуң бүдүрүлгелери-биле сырый кады ажылдажылганы практика кырында өөредилгеже угландырган.
Техникумда сентябрь 1-ден эгелеп, чер адааның казымалдар чыдынын болбаазырадыры чер адааның технологиялар, даг бүдүрүлгелеринде күш-ажыл камгалалында болгаш үлетпүрнүң айыыл чок чоруунуң адырында специалистер белеткээринге көрдүнген даг-болбаазырадылга адырының талазы-биле тускай өөредилге лабораториялары ажыттынган. «Электри болгаш электромеханиктиг дериг-херекселдер хандырарының технологиязы (даг-болбаазырадылга адыры)» база «Даг дериг-херекселдериниң септелгези» деп ийи бүдүрүлге-септелге шөлдери, ол даг машиналарын шенээр шөл ажыттынган.
Бо өөредилге чылында «Профессионалитет» федералдыг төлевилел-биле даг кластериниң ортумак профессионал өөредилге программазынга өөренир 600 хире кижини хүлээп алган.
«2035 чылга чедир республиканың экономиказының кол адырлары: даг-болбаазырадылга үлетпүрүнден эгелээш, өөредилгеге болгаш кадык камгалалынга чедир 13,5 муң специалистерни хаара тударын планнап турар бис. Ол стратегия бистиң республиканың аныяктарынга делгем перспективаларны ажыдып, Тываның турум хөгжүлдезинге үндезинни тургузуп турар» - деп, Владислав Ховалыг хурал соонда бодунуң телеграм каналынга дыңнаткан.