Владислав Ховалыг Кремльде «Күзелдер Ёлказындан»: Тывадан ийи база Луганск Улус Республикадан бир уругнуң улуг күзелдерин бижээн үш саазынны тырттып алганын бодунуң Телеграм каналынга дыңнаткан. Декабрьның 17-де Тывага, республиканың баштыңы Чаа чыл шивизинден 7 харлыг Аруна биле 8 харлыг Хаяның ыдыктыг күзээшкиннерин тырттып алгаш, Баштайгыларның шимчээшкини биле Росаныяктарның эрттирип турары регионда чаңчылчаан ачы-буян акциязынга ынчалдыр стартты берген.
«Уругларның күзелдерин бижээн үш чагааны шилип алдым: бир уруг Луганск Улус Республикадан болза, ийизи – Тывадан. Беш харлыг Идегел ойнаар-кызынга бажыңны, а 16 харлыг Кристина хол бөмбүүн күзеп турар болза, а ЛУР-дан 11 харлыг Екатерина чуруттунар будуктар алыр улуг күзелдиг. Бо күзелдерни албан күүседир мен» - деп, Владислав Ховалыг бодунуң телеграм каналынга бижээн.
«Күзелдер Ёлказы» акция деткимчеге хереглелдиг кижилерни болгаш уругларның күзелдерин боттандырып, Чаа чылдың хуулгаазынын көргүзеринге белен кижилерни каттыштырган.
Чаа чылда бодунуң төлүнүң, азы амыдыралдың берге байдалынга таварышкан, кадыкшылы кызыгаарлыг, өскүс, чединмес өг-бүлелерниң 3-тен 17 харга чедир уругларның күзээшкинин боттандырар дээш елкажеланий.рф акцияның албан езузунуң сайтызынга чагыг киирген күзелдер боттанып турар.
Акцияның организакчылары Луганск биле Донецк Улус Республикаларда, Запорожье биле Херсон областар девискээринде чурттап турарларның болгаш тускай шериг операциязында шериг албанныгларның өг-бүлелеринден уругларже онза кичээнгейни угландырган.
Владислав Ховалыг улуг улустуң ниити хүлээлгези – бичии уруглар буянныг чорукка болгаш чырыткылыг келир үеге ам-даа бүзүрээр кылдыр өөрүшкүнү сөңнеп, оларның илби-шидичилери апаарынга идегелин илереткен.