2026 чылдың Чаа чылының бүдүүзүнде, республиканың уттундурбас кол байырлалы – Тываның Баштыңының Чаа чыл Ёлказынга шупту булуңнардан муң хире чаштар киришкеннер. Декабрьның 24-те, В.Көк-оол аттыг Национал хөгжүм-шии театрынга чылдың кол Ёлказы болуп эрткен. Бо удаада тускай шериг операциязының киржикчилериниң өг-бүлелеринден уруглар, салым-чаяанныг школачылар, элээди спортчулар, амыдыралдың берге байдалдарынга таварышкан өг-бүлелерден уруглар Ёлкаже чалаттырган.
Тыва Республика Баштыңының Администрациязының иштики политика департаментизиниң начальниги Артына Бузур-оол уругларга байырны чедирген. Амгы үеде Москвада ажыл-албан аайы-биле сургакчылап чоруур Владислав Ховалыгның өмүнээзинден ол уругларга байырны чедирип, быжыг кадыкшылды, чаа-чаа чедиишкиннерни, күзелдериниң боттанырын күзээн. «Бистиң республикавыстың келир үези силер, силерниң кижи бүрүзүнге чоргаарланыр бис» - деп, ол чугаалаан.
Тываның Баштыңы бодунуң Телеграм каналынга (t.me/khovalyg_l...) уругларга байырны чедирген. Эң-не берге үелерде-даа чылдың-на республика Баштыңының Ёлказын уругларга эрттирери чаңчыл болган, ол анаа-ла хемчег эвес, а байырлалга болгаш кайгамчык чүүлдерге бүзүрелди бээр өөрүшкүлүг сактыышкыннарже сагыш салыышкын-дыр дээрзин ол демдеглээн. «...байырлал солун эрткенин билир мен. Уруг бүрүзүнүң күзелдери бүдерин, а чаа чылда аас-кежикти, кадыкшылды, чаа-чаа чедиишкиннерни сеткилим ханызындан күзедим. Кайгамчык чүүлдерге бүзүреңер, олар албан боттаныр!» - деп, ол бижээн.
Театрга тоолчургу карнавал болуп эрткен. Аалчыларның аразында Гарри Поттерге, Человек-паукка, Диснейниң принцессаларынга, Майя Арыга болгаш Черепаха-ниндзяларга ужуражып болур турган. Тываның бүгү булуңнарындан оолдар, уруглар боттарының чедиишкиннери болгаш күштүг тура-соруунуң ачызында бо Ёлкага маадырлар кылдыр хуула бергеш, ужурашканнар.
Театрның артистери уругларга Салтан хаан дугайында тоолчургу көргүзүгнү белеткээн. Фойеде тургускан Чаа чылдың Ёлказын долгандыр театржыткан өңгүр көргүзүг эгелээн. Артистер кыдат аалчы – Панданың киржилгези-биле Чаа чылдың төөгүзүн бараалгатканнар. Чаа чылдың кол маадырлары: Соок-Ирей, Харжыгаш, Хүрең-Адыг, Ак-Адыг, Баба-Яга уругларны хөглеткеннер.
Театржыткан көргүзүг соонда, уруглар оюннарлыг болгаш чогаадыкчы мастер-класстарлыг интерактивтиг программага киришкеннер. Байырлалдың төнчүзүнде, уруг бүрүзү республика Баштыңының чигирзиг белээн алганнар.
Тываның Баштыңының Чаа чыл байырлалы 500-500 школачыларлыг ийи аңгы бөлүкке эрткен. Бо болуушкун Национал театрга Чаа чылдың улуг хемчээлдиг утренниктериниң эгезин салган. Декабрьның 25-те кадыы кошкак уругларга байырлал болур.
Декабрь 26-да Тываның Дээди Хуралы Чаа чыл Ёлказын организастаар, ооң соонда ол-ла хүнде «Ада-чурт камгалакчылары» күрүне фондузунуң регионда салбыры Чаа чыл байырлалын эрттирер.