Тываның Чазааның даргазының оралакчызы албан-дужаалды күүседип турар Уран-оол Ондар Чөөн-Хемчикте чайынды суун чаяр ажылдарны дүүштүрер дээш, ында ажылдап турар. Ол Тываның Хамааты камгалал болгаш онза байдалдар албанының удуртукчузу албан дужаалды күүседип турар Андрей Сат база Тываның арга-арыг болгаш бойдус ажыглалының сайыды Григорий Ондар олар-биле суг айыылын тургускан черлерни эргип хынаан.
Оперативтиг хурал соонда, Чадаана хоорайның 4 дугаар школа чанында база Гортоп чоогунда көвүрүглер адаанда арык оруунда доштарны аштаап эгелээр деп шиитпирлээн соонда, ТСП КУБ-туң экскаватору ажылче кирген. Ийи бригада – Тываның ХК база ОБ албанының камгалакчылары, кожууннуң чагыргазы, Тываның ЧКА яамызы база “Восток” КХН-ниң ажылдакчылары ийи көвүрүгнүң ийи участогун деңге арыглап каапкан.
Эртенинде сугну чаярын планнааш, бо үе дургузунда камгалал чал чанынга четкини тургускан. Ынчалза-даа суг халавы өскээр барган. 20.15 шак үезинде Гортоп девискээриниң чоогунда көвүрүг адаанда тырылган доштар камгалал четкини үрээн деп дыңнадыг келген. Тырлы берген доштарны арыглаар деп турда, кыска үе дургузунда хемни куду баткан суг Победа, Вокзалняя, 40 лет Советтиг Тываның 40 чылы, Строительная, Нефтебаза кудумчуларда 12 бажыңның участоктарын апкан. Бажыңнар сугга алыспаан.
«Сугну чайган соонда, агымны чогуур угланыышкынче бадырар дээш ,баш бурунгаар шинчиледи чоруткан турган. Эртенинде сугну чоорту бадырыптар деп турувуста, айыыл бо келген – деп, Тываның ХК база ОБ албанының удуртукчузу албан-дужаалды күүседип турар Андрей Сат тайылбырлаан. – Мооң мурнунда байдал контрольтатттынмайн барган болза, бо удаада дыка дүрген организастапкан бис. Суг оруун аштапкаш, хоорай адаанче үш хире километрде чогуур черже чайган».
Сугну чайган соонда, социал ажылдакчылар биле кожуун чагыргазы үстүнде адаан кудумчуларны эргий кезээн. Кожууннуң 6 дугаарлыг өрт-камгалал кезээниң ажылдакчылары Нефтебаза кудумчузундан сугну сордурган.
Саттың бодалы-биле алырга, бо удаада тырлы берген доштуг сугнуң агымы биргизинден күштүг болза-даа, сугга алыскан участоктар саны эвээш болган.
Оперативтиг бөлүктү удуртукчузу, вице-премьер Уран-оол Ондарның тайылбырындан алырга, улаштыр кылыр ажылдарның чорудуун база он ийи хире километр хире узун участоктуң инженерлиг катап тургузулга ажылдарын планнаарынче кол кичээнгейни салган. Катап тудуушкун ажылдары дээш харыысалгалыг кижилерни томуйлаан, немелде күштерни болгаш курлавырларны мөөңнээн. Бир бригада дүне-ле ажылын эгелээн, олар Бажың-Алаак суурнуң көвүрүүнден куду суг оруун тырттып, чаартып, алызында Чадаана хемче киир угландырар. Чадаана хоорайны дургаар арык суун долдурар үстүкү кезекте суггарылга системаларынче хемден ийи адырны дуглаары планнаттынган.
Ажылдарже 54 кижи, 27 техника хаара туттунган. Онза байдалдар яамызының ажылдакчылары, хамааты камгалал болгаш онза байдалдар албанының специалистери, чуртталга-коммунал ажыл-агый яамызының, Тываның арга-арыг яамызының, «Восток», «СтройЭкспресс» КХН-ниң, «Чөөн-Хемчик» №6 өрт-камгалал кезээниң, кожуун болгаш Чадаана хоорай чагыргазының специалистери, а ол ышкаш кожууннуң бюджет албан черлеринден эки турачылар болгаш хоорайжылар бир демниг ажылдааннар.
ТР-ның Чазааның Даргазының оралакчызы албан-дужаалды күүседип турар Шолбан Сендаш Чаа-Хөл кожуунунга ажылчын сургакчылаашкынга чорааш, болуушкун болган черже дарый үнген. Суг айыылы чайлаттынган, түр када чурттаар черде кым-даа чок, ол ышкаш сугга алыскан кудумчулардан чурттакчы чонну өскээр көжүрер ажылдар херек чок, байдал контрольда деп дыңнаткан.