Бо чылын республика Баштыңының Чаа чылдың чаңчылчаан Елказы декабрь 24-те В.Көк-оол аттыг Национал хөгжүм-шии театрынга болур. Чаа чылдың оюн-тоглаазы ийи аңгы агымга болур: бирээзи 11:00 шакта, а ийигизи 15:00 шакта. Республиканың шупту 19 муниципалдыг тургузугларындан ниитизи-биле бир муң школачылар, оларның аразында Тываның күрүне өөредилге албан черлериниң өөреникчилери киржир.
Бии-Хем кожуундан аңгыда, республиканың шупту кожууннарының өөреникчилери бирги улуг хемчегге киржир. Бо кожууннуң өөреникчилери Кызылдың болгаш республиканың күрүне өөредилге черлериниң өөреникчилери-биле кады ийиги агымга ужуражыр.
Тыва Баштыңның Елказынче өөредилгезинге шылгараан салым-чаяанныг өөреникчилерни, тускай шериг операциязының киржикчилериниң ажы-төлүн, амыдыралдың берге байдалынга таварышкан өг-бүлелерден школачыларны чалаанын сагындыраал. Чаа чыл байырлалының киржикчилерин тус черде тускай комиссиялар чогуур квота санынга шилээн.
Тыва Баштыңның Ёлказын чылдың-на эрттирери республикада чаагай чаңчыл апарган. Чугула болгаш уттундурбас болуушкун болу бээр ол байырлалче бүгү Тывадан чүс-чүс уругларны чалаар. Хемчеглер программазында байырлалдың оюн-көргүзүү, ойнаар шөлдер болгаш чогаадыкчы мөөрейлер хөй. Уруглар Соок-Ирей биле Харжыгаштан байыр чедириишкиннерин, ол ышкаш республика Баштыңындан чигирзиг белектерни алырлар.
В.Көк-оол аттыг Национал хөгжүм-шии театрынга декабрь 25-те 11:00 шакта, кадыкшылы кызыгаарлыг 300 уругларга Чаа чылдың байырлалы болур.
Декабрьның 26-да 11:00 шакта база-ла улуг театрга, Тыва Республиканың Дээди Хуралының (парламентизиниң) уругларның Чаа чыл Ёлказы болуп эртер, аңаа 500 уруглар киржир. Дүштекиниң 15 шакта Тыва Республикада «Ада-чурт камгалакчылары» деп тускай шериг операциязының киржикчилерин деткиир күрүне фондузунуң Чаа чыл елказы болур, ынаар база 500 оолдар, уругларны чалаан.