Владислав Ховалыг энергетика адырында ажылдап чоруур бүгү-ле ажылдакчыларга профессионал байырлалы-биле байырны чедирген. Оларның ажылы регионда чуртталга бажыңнарынга, эмнелге болгаш өөредилге албан черлеринге, үлетпүр бүдүрүлгелеринге чырык болгаш чылыгты хандырып турарын ол бодунуң байыр чедириишкининде демдеглээн.
"Силерниң күш-ажылыңар – бистиң регионнуң амыдыралының болгаш хөгжүлдезиниң үндезинин тургузуп турар. Тываның берге агаар-бойдузунуң байдалында, ылаңгыя ыраккы суурларда энергетика системазының ажылдаарын хандырып турар силер. Регионнуң энергетика инфраструктуразының хөгжүлдези узун орукту эрткен – бирги дизельдиг генераторлардан эгелээш, амгы үениң чылыдылга электри станцияларынга чедир" - деп, Владислав Ховалыг бодунуң телеграм каналында демдеглээн.
Республиканың Баштыңы регионнуң энергетика адырының таваан салып, профессионал арга-дуржулгазын аныяк салгалдың специалистеринге дамчыдып берген энергетика адырының хоочуннарынга база онза өөрүп четтиргенин илереткен.
Бо чылын Тываның энергетика адырының тургустунганындан бээр 100 чыл оюн демдеглеп турарын демдеглезе чогуур. Төөгүнүң арыннарындан алырга, регионнуң энергетика адырының хөгжүлдези Совет Эвилелинден Тыва Арат Республикага дамчыткан 40 киловатт күчүлүг нефть-биле ажылдаар электростанциядан эгелээн. Ленин кудумчузунда даштан кылган 27 дугаарлыг бажыңынга баштайгы генераторну тургускан, ам ында А.С. Пушкин аттыг Республиканың ном саңының салбыры бар.
Бөгүнде республиканың чырык энергиязынга ниити хереглели 180 мегаватт четкен, а регионнуң энергетика адырында 2500 ажыг кижи ажылдап турар.