Тываның Баштыңы Владислав Ховалыгның чарлыы-биле Шолбан Сендашты Тыва Республиканың Чазааның Даргазының оралакчызы албан-дужаалда томуйлаан. Чаа оралакчы дарга регионда корум-чурум камгалаар, хөй-ниитиниң айыыл чок чоруун хандырар, терроржу база экстремисчи чүүлдерни болдурбас талазы-биле күрүнениң чаңгыс аай политиказын боттандырарынга, ол ышкаш хамааты камгалал болгаш онза байдалдарны болдурбас болгаш чайладыр ажыл-чорудулганы дүүштүрери дээш харыысалгалыг.Шолбан Сендаш Ак-Довурак чурттуг. Ол юрист эртемниг. 1996 чылдың июньдан 1999 чылдың октябрьга чедир Тыва Республиканың Иштики херектер яамызынга албан эрттирген. 1999 чылдың ноябрьдан 2020 чылга чедир Кызыл хоорайның база Улуг-Хем, Чеди-Хөл кожууннарның прокуратуразынга ажылдаан.
Шолбан Сендаш чаа албан-дужаалче томуйладырының мурнунда республика Баштыңының Администрациязында база республиканың Чазааның Аппарадында күрүне албанының айтырыглары болгаш эрге-хоойлу ажылының департаментизиниң начальниги болуп ажылдап турган.
Республиканың Баштыңы чаа оралакчызының мурнады көөр ажылы кылдыр – Чаа чылдың узун байырлалдар хонуктарында корум-чурумну хандырар база кем-херек үүлгедиишкиннерин болдурбас даалгазы берген.