Тываның Баштыңы Владислав Ховалыг болгаш Тыва Республиканың Чазааның кежигүннери Тываның күрүне ажылдакчызы Амур Увангурнуң эрте мөчээни-биле ооң өг-бүлезинге болгаш эш-өөрүнге ханы кажыыдалды илереткен. Амур Кара-Хунаевичиниң чүрээ 57 харлыында сокпайн барган.
«Тыва Республиканың Тес-Хем кожуун чагыргазының даргазының оралакчызы болгаш аппарадының удуртукчузу коллегавыс Увангур Амур Кара-Хунаевичиниң чок болганын ханы кажыыдал-биле дыңнадып тур бис. Ооң амыдырал-чуртталгазы ниитилелге бараан болурунга, ажылынга бердингенинге чырыткылыг үлегери болган» - деп, кожууннуң чагыргазы социал четкилерде дыңнаткан. Оон аңгыда Амур Кара-Хунаевичини чогаадыкчы, эки база сагыш човаачал, төрээн черинге сеткилден ынак, чонунга ак сеткилдиг бараан болуп чоруур кижи кылдыр артар дээрзин демдеглээн.
Амур Кара-Хунаевич Увангур 1969 чылдың январь 23-те Тыва АССР-ниң Тес-Хем кожууннуң Белдир-Арыг суурга төрүттүнген. Турцияның Улудаг университедин 1997 чылда «филолог» эртемниг дооскан. 2023 чылда Тываның күрүне университединге күрүне болгаш муниципалдыг эрге-чагырга талазы-биле магистр эртемни чедип алган.
1985 чылда Тес-Хем кожууннуң Чыргаланды ортумак школазынга күш-ажылчы базымнарын эгелээн. Тыва Республиканың Чазааның чанында Гуманитарлыг болгаш тускай социал-экономиктиг шинчилелдер институдунуң литература салбырынга 1999 чылдан бээр ажылдаан. Амур Кара-Хунаевич өөредилге адырынга хөй чылдарны бараалгаткан: он чыл дургузунда төрээн кожуунунда Чыргаланды ортумак школазының директорунга ажылдап, 2011 чылдан 2013 чылга чедир Кызыл кожуунда Элегес-Аксы суурда өскүс болгаш хайгаарал чок арткан уругларга 8-ки хевирниң республиканың тускай (коррекциялыг) школа-интернадын удурткан.
Өөредилге системазынга улуг арга-дуржулгазы ооң дараазында ажыл-ижиниң үндезинин тургускан. Ооң социал хереглелдерни эки билири ону республиканың Күш-ажыл болгаш социал политика яамызынче эккелген, аңаа дөрт чыл дургузунда сайыттың оралакчызы болуп ажылдаан. Ооң соонда ол Кызылдың чонну ажылга хаара тудар төвүн удуртуп, республика найысылалының чурттакчыларын ажылга хаара тудар, социал хандырылга талазы-биле дузалап турган
2023 чылда Тес-Хем кожуун чагыргазынга ажылдап эгелээн. Баштай кожуун чагыргазының даргазының оралакчызының хүлээлгезин күүседип, ооң соонда даргазының оралакчызы болгаш аппарат удуртукчузу болуп сөөлгү хүнүнге чедир ажылдаан.
«Амур Кара-Хунаевич Тываның хөй-ниити амыдыралының идепкейлиг киржикчизи, чаңгыс чер чурттугларының амыдырал-чуртталгазын экижидер дээш бүгү күжүн берип чораан. Энерел сеткили, мерген угааны, өскелерге дуза кадар чүткүлү ооң-биле кады ажылдап чораан кижилерниң сагыжынга артар» - деп, Тес-Хем кожуун чагыргазы демдеглээн.
Амур Увангур күш-ажылчы чылдарында хөй санныг ведомство шаңналдарынга төлептиг болуп, Тыва Республиканың Өөредилге, эртем, аныяктар политиказының яамызының Хүндүлел бижиин алган. 2009 чылда Тыва Республиканың Чазааның Даргазының Хүндүлел бижии-биле, а 2021 чылда Тываның Баштыңының Хүндүлел бижии-биле шаңнаткан.
Декабрьның 23-те 12:00 шакта дараазында адрестен Амур Кара-Хунаевич Увангур-биле байырлажыр: Тес-Хем кожуун, Белдир-Арыг суур, Адыя Самдан кудумчузу, 19, кв. 2.