«Победа» спортчу-культура төвүнүң байырлыг ажыдыышкынының үезинде Тываның спортчу ниитилелиниң кол болуушкуну – «Спортчу элита-2025» мөөрейниң тиилекчилеринге болгаш тергииннеринге шаңналдарны тывыскан. Республиканың Баштыңы Владислав Ховалыг күрүне шаңналдарын тывыскан.
Владислав Ховалыг байырлыг хемчегниң киржикчилеринге болгаш республиканың спортчу ниитилелиниң төлээлеринге, чаа ажыттынган төп бүгү-российжи болгаш делегей чергелиг бедик деңнелдиг маргылдааларны, ол ышкаш культурлуг улуг хемчеглерни эрттирер аргалыг апарган деп демдеглээн.
«Россияның хостуг хүреш чемпионады, кубогу дээн ышкаш, российжи база делегей чергелиг маргылдаалар эрттирер арга-дуржулга Тывада бар. Бо чаа, амгы үениң оран-савазы чаа аргаларны тургузуп, Россияның федералдыг Спорт яамызының, Олимпийжи комитединиң, спортчу федерацияларының планнарынга Тыва ам төлептиг черни ээлээр» - деп, республиканың удуртукчузу чугаалаан.
Владислав Ховалыг элээди спортчуларны белеткеп кижизидеринге көскү чедиишкиннерни чедип алган күш-культура болгаш спорттуң тергиин ажылдакчыларынга күрүне шаңналдарын тывыскан.
Күш-культура болгаш спорттуң хөгжүлдезинге киирген үлүг-хуузу дээш Олимпийжи курлавыр спорт школазының хостуг хүреш тренер башкызы Ламажап Сүгдер Владимировичини Тываның Баштыңының Хүндүлел бижии-биле шаңнаан.
Олимпийжи курлавыр спорт школазында хостуг хүреш тренер башкызы Сат Оттук Владимировичини Тываның Баштыңының Хүндүлел бижии-биле шаңнаан.
Аныяк салгалдың күш-культуразынга белеткеп кижизидеринге үре-түңнелдиг ажылы болгаш чедиишкиннери дээш «Тыва Республиканың алдарлыг тренери» хүндүлүг атты ЦСКА-ның Тыва Республикада Олимпийжи курлавыр спорт школазының сумо тренери Монгуш Экер Орлановичиге тывыскан.
«Тыва Республиканың алдарлыг тренери» хүндүлүг атты Тыва Республиканың чыынды командаларының спортчу белеткел төвүнде спортчу болгаш хостуг хүреш тренери Ондар Аян-оол Александровичиге тывыскан.
Күш-культура болгаш спортту хөгжүдеринге ачы-хавыяазы болгаш хөй чылдарда ак сеткилдиг күш-ажылы дээш Өвүр кожууннуң спорт школазының директору Виктор Монгушевич Достайны Тыва Республика ордени-биле шаңнаан.
«Спортчу элита-2025» хемчегниң үезинде республикада тергиин спортчуларынга, тренерлеринге, күш-культура болгаш спорт ажылдакчыларынга шаңналдарны тывыскан.
2025 чылдың түңнелдери-биле дараазында категорияларга шаңналдарны тывыскан:
Спорттуң олимпийжи хевиринге тулган спортчу — хостуг хүрешке Европа чемпиону Начын Монгуш;
Параспорттуң тулган спортчузу — Россияның алдарлыг спорт мастери Дженни Чамыян;
Профессионал спортка тергиин спортчу — кикбоксингиге Россия база Европа чемпиону Ренат Ондар;
Спорттуң олимпийжи эвес хевирлеринге тулган спортчу — ушуга Сибирь федералдыг округтуң регионалдыг маргылдааларының тиилекчизи база призёру Бырынай Очур;
Чылдың спортчузу — хостуг хүрешке Россия чемпиону Сайын Казырык;
Спорттуң олимпийжи хевирлеринге тергиин тренер — Алибек Хомушку;
Спорттуң олимпийжи эвес хевирлеринге тергиин тренер — Монгун-оол Иргит;
Параспортта тергиин тренер — Чойгана Ооржак;
Тулган дээн уруглар тренери — Менги Монгуш;
Спорттуң национал хевирлеринге тергиин тренер — Соломон Сарыглар;
Тыва Республиканың тергиин спортчу командазы — «Дөгээ» волейбол командазы;
Тергиин спортчу федерация — Тыва Республиканың спортчу хүреш федерациязы;
ТР-ниң күш-культура болгаш спортту хөгжүдеринге шылгараан муниципалдыг тургузуг — Барыын-Хемчик кожуун;
Тыва Республиканың тергиин спортчу школазы —олимпийжи курлавырның «Олимп» спорт школазы;
Тергиин спортчу клуб — «Олимп» фитнес-клубтар четкизи;
МИЧ-ке спортту суртаалдаан тергиин организация — «ТываМедиагрупп» медиахолдинг;
«Тергиин күш-культура башкызы – 2025» и «Спортчу углнаашкынныг немелде өөредилгениң тергиин башкызы-2025» — Сарыглар Айдыс;
«Тываның идегелдери» тускай номинацияның тиилекчилери — Чингис Сарыглар, Шоюр-оол Ая;
«Спортта эпоха» тускай номинацияның тиилекчизи — спорттуң хоочуну, ССРЭ-ниң спорт мастери Анатолий Кара-Сал;
«Ада-иениң алдары» тускай номинацияның тиилекчилери —шахматка мастерлер апарган ажы-төлдү кижизиткен Светлана Ивановна биле Эрес Иванович Иргиттерниң өг-бүлези;
«Хүреш» тыва хүрештиң тергиини — Куулар Монге-Эртине;
Аът чарыжының тергиини — Эртине Эрес;
Эр база херээженнер аразынга «Мерген адыгжы» — Монгуш Сылдыс, Даржай Шенне.