Россияның Президентизи Владимир Путинниң декабрь 19-та эрткен «дорт шугумунче» Тыва Республиканың чурттакчыларындан 3000 хире айтырыглар кирген. Бүгү-российжи Улусчу фронтунуң регионалдыг күүсекчи комитеди ооң дугайында дыңнаткан. Кижилерни социал политика, чуртталга айтырыглары, тускай шериг операциязы, экономика, күрүне эргелеп-башкарылгазы болгаш хөй-ниити амыдыралы болгаш инфраструктура айтырыглары дүвүредип турары билдинген.
Улусчу фронтунуң регионалдыг салбыры Тываның чурттакчыларындан Президентиге келген айтырыгларны шиитпирлээрин хыналдага алыр. Баштай кылымал угаан-биле айтыргыларны шуптузун аайлап бөлүктээш, ооң соонда оларны волонтерлар хынаарын организация тайылбырлаан. Ооң соонда айтырыгларны харыысалгалыг күүсекчи эрге-чагырга органнарынче болгаш аңаа хамааржыр албан черлеринче дамчыдар.
Айтырыгларны чаңгыс аайлап, бөлүктээн соонда ооң чиге саны билдине бээрге, ону регинга ажылдап шиитпирлээри-биле дамчыдар. Бир эвес катаптап турар, ужур-утка чок база номчуттунмас айтьрыглар таваржы бээр болза, ону сандан ап кааптар.
Яамыларның болгаш ведомстволарның шупту удуртукчулары «дорт шугумну» хынамчылыг хайгарап турганнар. Тываның Баштыңы Владислав Ховалыг бодунуң Телеграм каналында бижээни-биле алырга, аңаа ол анаа-ла болуушкун эвес, а чурттуң хөгжүлде угланыышкынының болгаш амгы үеде күрүне политиказының мурнады хөгжүдер айтырыгларынга чугула медээлерниң дөзү болганын айыткан. Дамчыдылга үезинде регион деңнелинге дүрген харыы негеттинип турар кол айтырыгларны демдеглеп алганын ол чугаалаан. Тыва чазактың кежигүннери «дорт шугум»-биле ажылдааннар.
«Президент айтырыгларга анаа-ла харыылавайн, хүлээп алдынар шиитпирлериниң дугайында тодаргай тайылбырны бергени онзагай. Ол чүүл күрүне политиказы сырый харылзаалыын эки билип болгаш федералдыг хүн чуруму-биле регионалдыг чагыргалар ажылын чаңгыс аайлап алырынга дузалаар» - деп, Владислав Ховалыг демдеглээн.
Россияның Президентизи Владимир Путин-биле чаңчылчаан «дорт шугум» 21 дугаар болуп эрткен. 4 шак 27 минута үргүлчүлээн дамчыдылга үезинде башкарыкчылар 80 ажыг айтырыгларны Президентиге салган, а күрүне Баштыңының адынче 3 миллион ажыг айтырыглар кирген. Президент Украинага хамааржыр айтырыгларга харыылап, фронтуда байдалды чугаалаан, ол ышкаш кол экономиктиг көргүзүглерни, демографияны болгаш өске-даа чидиг айтырыгларны сайгарып көрген.
Президент ниитизи-биле 29 российжи журналистерге болгаш сес даштыкы массалыг информация чепсектериниң төлээлеринге харыылаан. Дөрткү айтырыг бүрүзү социал политикага хамааржыр болган. Президентиниң хуу амыдыралынга хамаарышкан 22 айтырыгны салган.