Кызыл кожууннуң Каа-Хем суурга амгы үениң, хөй талалыг ажыл-чорудулгалыг «Победа» спорт-культура төвүнүң байырлыг ажыдыышкыны болуп эрткен. Чаа объектиге бирги хемчег – шыырак спортчуларны, тренерлерни, активчилерни, федерациялар болгаш спортчу организацияларны, күш-культура болгаш спорт ажылдакчыларын шаңнаан «Тыва спортчу элита 2025» байырлыг езулалды эрттирген. Россияның спорт сайыды Михаил Дегтярев база Тываның Баштыңы Владислав Ховалыг республиканың эң улуг, 4500 чедир көрүкчүлер хүлээп алыр спортчу-культура комплекизиниң ажыттынганы-биле байырны чедиргеннер.
Михаил Дегтярев республиканың чурттакчыларынга видеохарылзаа дамчыштыр байырын чедирген. Улуг Тиилелгениң 80 чылдаан оюнда «Победа» спортчу-культура төвүн ажыдып турары улуг ужур-уткалыг деп сайыт демдеглээн.
«Россияның спорту» күрүне программазы-биле төптүң тудуу 2013 чылда эгелээн. Объектиниң тудуунче 3,5 млрд ажыг рубльди үндүрген. Төпте 4500 олуттуг хөй ажыглалдыг арена, ийи спорт залдары бар, оларның бирээзи кадыкшылы кызыгаарлыг кижилерге тускай дериттинген. Төп хөй талалыг: ча адар, бокс, дзюдо, кик-боксинг, сумо, хүреш дээш, янзы-бүрү спортчу хевирлерге белеткениринге болгаш маргылдааларны эрттиреринге таарымчалыг байдалдыг. Залды болгаш аренаны өскертип тургаш, аңаа волейбол, баскетбол, мини-футбол, гандбол ойнаар арга бар.
«Регионнуң чурттакчыларынга төптүң ажыттынганы-биле байыр чедирип, кижи бүрүзүнге бүзүрелди, идегелди, ынакшылды күзедим. Россияга болгаш спортка ынакшыл – бисти каттыштырып турар!» - деп, Михаил Дегтярев чугаалаан.
Владислав Ховалыг байырлалдың киржикчилеринге болгаш көрүкчүлерге байыр чедирип тура, Президент Владимир Путинниң болгаш Россияның Чазааның деткимчезиниң ачызында, чурттуң Спорт яамызының болгаш Тудуг яамызының доктаамал деткимчези-биле төптү тутканын демдеглээн. Төптүң ажыглалче киреринге чүс-чүс тудугжулар, мастерлер, аңгы-аңгы организацияларның болгаш албан черлериниң ажылдакчылары улуг үлүг-хуузун киирген.
Чурттакчы чоннуң ортумак назы-хары 30 хардан бичии-ле улуг Тывага спортчу объектилерниң хереглели улуг, а спортчуларывыс Россияның болгаш делегейниң улуг маргылдааларында мурнуку черлерни ээлеп, республиканы алдар-биле төлээлеп турарын Баштың демдеглээн.
Регионнуң баштыңының чугаазы-биле алырга, чаа төп бүгү-российжи болгаш делегей чергелиг бедик деңнелдиг маргылдааларны, ол ышкаш культурлуг улуг хемчээлдиг хемчеглерни эрттирер арганы алган.
«Тыва хостуг хүреш чемпионады, Россияның кубогу дээн ышкаш, российжи база делегей чергелиг бедик деңнелдиг маргылдааларны эрттирер арга-дуржулгазы четчир. Амгы үениң чаа объектизи Россияның федералдыг Спорт яамызының, Олимпий комитединиң, спортчу федерацияларның планнарынга Тывага төлептиг черни бээр арганы ажыдар» - деп, Баштың чугаалаан.
«Хайлэнд Голд» база «Эльбрусметалл-Литийум» база «Сбербанк» компанияларның спонсор деткимчези-биле, спорттуң адаптивтиг хевирлеринге аңгы залдар чепсеглеттинген деп Владислав Ховалыг дыңнаткан. Ол ышкаш Россияның улуг спортчу федерациялары залды дериг-херекселдер-биле хандырарынга база дузалаан.
Владислав Ховалыг төптүң культурлуг талазын база онзалап айыткан. Улуг делгем көрүкчүлер залы төпке улуг хемчээлдиг концерттерни эрттирер болгаш сураглыг күүседикчилерни болгаш улуг ансамбльдерни республикаже чалап алыр арганы бээр. Келир чылын чаа төпке IV делегей чергелиг буддийжи форумнуң хемчеглери база планнаттынганын регионнуң Баштыңы дыңнаткан.
Улуг Тиилелгениң 80 чылын болгаш Ада-чурт камгалакчызының чылын демдеглеп турар чылда улуг хемчээлдиг социал инфраструктура объектизиниң ажыдыышкыны уттундурбас болуушкун бооп артар. 2025 чыл Тывага спортчу чедиишкиннер-биле байлак чыл болган. Тываның чыынды командалары сумога Россия чемпионадынга бирги черни, Россияның кикбоксинг кубогунга командалыг бирги черни, ол ышкаш Россияның хүреш Кубогунга команда аайы-биле бирги черни чаалап алганнар.
Тываның спортчулары бүгү-российжи болгаш делегей деңнелдиг маргылдааларга 639 медальды чүгле бо чылын чаалап экеелген.