Бөгүн, декабрь 19-та, Улусчу чогаадылга бажыңынга Тываның революсчу аныяктар эвилелиниң тургустунганындан бээр 100 чыл оюнга тураскааткан байырлыг хемчег болуп эрткен. Аңаа аңгы-аңгы салгалдарның аныяктар шимчээшкиннериниң идепкейжилери база Тываның революсчу аныяктар эвилелиниң хоочуннары: Григорий Ширшин, Дандар-оол Ооржак, Алдын-оол Канзай киришкеннер.
Тываның Баштыңы Владислав Ховалыг чыылганнарга байырын чедиргеш, сөөлзүредир республиканың удуртукчулары болуп, ооң хөгжүлдезинге улуг үлүг-хуузун киирген ВЛКСМ Тыва обкомунуң удуртукчуларынга четтиргенин илереткен. Комсомолчу идепкейжилер үнелиг арга-дуржулганы чедип алгаш, Тывада экономика удуртукчуларының болгаш күрүне ажылдакчыларының мурнуку одуруун тургусканын Баштың демдеглээн.
Владислав Ховалыг 100 чыл бурунгаар үндезилеттинген Тываның Революсчу аныяктар эвилели аныяк күрүнени тургузарынга болгаш быжыглаарынга идепкейлиг киришкенин демдеглээн. Революсчу Аныяктар эвилелиниң кежигүннери үжүк-бижик билбес чорукту узуткаар, школалар, клубтар, эмнелге пунктуларын тудар шимчээшкинниң мурнунга турганнар. Ада-чурттуң Улуг дайынының чылдарында фронтуга дузаны көргүскеннер. Тыва Арат Республика ССРЭ-ге каттышкан соонда, Тываның Революсчу Аныяктар Эвилелиниң кежигүннери Совет Аныяктарның чаңгыс эвилелинче кирип, үлетпүр хөгжүлдезинге, кур черни шиңгээдиринге болгаш улуг тудуг төлевилелдеринге киришкеннер. Аныяктар «Туваасбест» болгаш «Тувакобальт» комбинаттары бүгү-эвилелдиң комсомолчу чугула тудугларынга база чаа Шагаан-Арыг хоорайны тударынга үлүүн кирген. Студент тудуг отрядтары чылдың-на күш-ажылчы вахталарга киржип турган. Көдээ ажыл-агыйынга аныяктар коллективтери идепкейин көргүскен. Тываның аныяк спортчулары, культура болгаш уран чүүлдүң профессионалдары республикадан дашкаар төрээн черин алдаржыткан.
Республиканың Баштыңы чурттакчы чоннуң үштүң бир кезии аныяктар чурттап турар республикага аныяктар шимчээшкининиң төөгүлүг арга-дуржулгазын бөгүнгү байдалда ажыглаарын саналдаан. «Ол дээрге бистиң күжүвүс, экономиктиг болгаш социал чаартылгаларның шимчедикчизи-дир» - деп, ол демдеглээн. Владислав Ховалыг бо чылын республикада, 2030 чылга чедир аныяктар политиказын хөгжүдериниң стратегиязы бадылаттынганын сагындырып, ол патриотчу, сүлде-сүзүк болгаш мөзү-шынар талазы-биле бышкан, харыысалгалыг болгаш амгы үениң эртем-билии база технологиялары-биле чепсегленген аныяк кижилерниң чаа салгалын хевирлээринче угланганын сагындырган. Ол ышкаш Тывада аныяктар политиказының хөгжүлдези чаа чадаже киргенин демдеглээн: чоокта чаа «Тываның маадырлары» регионалдыг кадрлар программазының киржикчизи, Россияның Маадыры Буян Куулар бо адырда чаа идеяларны ажылдадыр болгаш боттандырар республиканың аныяктар яамызының удуртукчузунда томуйлатканын демдеглээн.
Бо хүнде Тывада янзы-бүрү аныяктар организациялары, каттыжыышкыннары идепкейлиг ажылдап турар. Оларның аразында «Баштайгыларның шимчээшкини», «Аныяк армия», «Тываның буянныг чүректери», «Тиилелгениң волонтерлары» дээш, оон-даа өскелер бар. Владислав Ховалыг аныяктарның массалыг шимчээшкини эш-өөр, найырал, бот-боттарынга дуза, аныяктарның чаа бедиктерже чүткүлү дээн ышкаш, үндезин үнелиг чүүлдерге үндезилеттинген деп демдеглээн. «Тываның революсчу аныяктар эвилелиниң юбилейи аңгы-аңгы салгалдарның, чоннарның, мергежилдерниң болгаш сонуургалдарның төлээлерин мөөңнеп чыгган» - деп, Баштың демдеглээн.
Байырлыг хемчег үезинде шаңнал тыпсыр езулалды база эрттирген. Республика Баштыңы өзүп орар салгалды сайзырадып, кижизидеринге улуг үлүг-хуузун киирип чоруур волонтер болгаш хөй-ниити организацияларының удуртукчуларынга шаңналдарны тывыскан.
«Баштайгыларның шимчээшкини» бүгү-российжи уруглар болгаш аныяктарның хөй-ниити-күрүне шимчээшкининиң Тыва Республикада регионалдыг салбырының стратегтиг хөгжүлде чөвүлелиниң даргазының оралакчызы Тайгана Монгушка, «Баштайгыларның шимчээшкини» бүгү-российжи уруглар болгаш аныяктарның хөй-ниити-күрүне шимчээшкининиң Тыва Республикада регионалдыг салбырының төлевилелдер удуртукчузу Артыш Тюлюшка, «Юнармия» бүгү-российжи шериг-патриотчу хөй-ниити шимчээшкининиң Тыва Республикада регионалдыг штавының удуртукчузу Айдың Шивидекке база Россияның уруглар болгаш элээдилер төвүнүң хамаатыларның патриотчу кижизидилге адырында төлевилелдер болгаш программалар боттандырар килдизиниң специализи Азияна Увангурга Тыва Республиканың Баштыңының Өөрүп четтириишкинин тывыскан.
Тыва Республикада «Тываның буянныг чүректери» аныяктарның хөй-ниити шимчээшкининиң даргазы Артыш Монгуш идепкейлиг хамааты туружу болгаш хөй чылдарда хөй-ниити ажыл-чорудулгазы дээш Тываның Баштыңының Хүндүлел бижиин алган.