Владислав Ховалыг «Күзелдер Ёлказы» деп акцияга киришкенин бодунуң телеграм каналынга дыңнаткан. Республиканың Баштыңы Тываның Чазааның бажыңында тургускан байырлалдың шивизинден 7 харлыг Аруна биле 8 харлыг Хаяның ыдык күзелдерин тырттып алган. Баштайгыларның шимчээшкини болгаш Росаныяктарның кады организастааны чаңчыл болу берген ачы-буян хемчээнге стартты берген.
Эрзин кожууннуң Качык суурдан Аруна биле Өвүр кожууннуң Хандагайты суурдан Хая Чаа чылда тывызыксыг белек алырын күзеп турарлар. Владислав Ховалыг уругларга езулуг кайгамчык байырлалды сөңнээр дээш, оларның күзелдерин канчаар күүседирин амдыгааштан боданыр апаар деп чугаалаан.
Тываның Баштыңы регионда ажылдап турар кол инвесторларның бирээзи «Эльбрусметалл-Литий» компания тускай шериг операциязының киржикчилериниң ажы-төлүнге Чаа чылдың белектерин садып бээр күзелин илереткенин дыңнаткан.
"Чаа чыл - уруг бүрүзү белек алырын күзеп чоруур тоолчургу үе. Тускай шериг операциязының киржикчилериниң ажы-төлүнче онза кичээнгейни салган бис. Кол инвесторларывыстың бирээзи «Эльбрусметалл литий»-биле кады ажылдажылгавыс ачызында, бистиң эрес-дидим дайынчыларывыстың өг-бүлелериниң шупту уругларын Чаа чыл белектери-биле өөртүр бис» - деп, Владислав Ховалыг бодунуң телеграм каналында дыңнаткан.
Тываның Баштыңы акция эгелээнин чарлаан соонда, чазак даргазының оралакчылары Орлан Сарыглар, Уран-оол Ондар, Аяс Хунай-оол, Айдыс Сынаа база республика болгаш федералдыг албан черлериниң удуртукчулары шивиден уругларның күзелдерин бижээн шарларны тырткан. Владислав Ховалыг Чаа чыл байырлалдарының бүдүүзүнде уругларга уттундурбас аас-кежиктиг үени сөңнээри-биле, «Күзелдер Ёлказы» акцияга киржиринче чаңгыс чер чурттугларын кыйгырган.
Амыдыралдың берге байдалынга таварышкан уругларның Чаа чылда күзелдериниң боттандырыкчызы болур дээш, кижи бүрүзү елкажеланий.рф акцияның албан езузунуң сайтызынче чагыгны киирип болур. Бүгү чуртта уругларның муң-муң күзелдери бо буянныг эгелээшкинниң ачызында чылдың-на бүдүп турар.
2018 чылда Россияның Президентизи Владимир Путинниң эгелээшкини-биле «Күзелдер Ёлказы» акция эгелээнин сагындыраал. Төлевилел тоолчургу Чаа чылды боттандырар күзелдиг база дуза хереглеп турар улустуң бодалдарын боттандырар кижилерни чыып мөөңнээн. Акцияда амыдыралдың берге байдалынга таварышкан 3 хардан 17 харга чедир назылыг уруглар, кадыкшылы кызыгаарлыг, өскүс уруглар, эвээш орулгалыг өг-бүлелерниң ажы-төлү киржип турар. Тускай шериг операциязында киржип турар шериг албанныгларның өг-бүлелеринден база ЛУР, ДУР, Запорожье, Херсон областарда чурттап турар уругларже онза кичээнгейни салган.
Оон ыңай MAX мессенджерде trk.mail.ru/c/sz6i67 айтыг таварыштыр «Күзелдер Ёлказы» акцияже каттыжып болур.