Бөгүн регионнуң Чазак хуралынга Тываның Баштыңы Владислав Ховалыг республиканың чаа аныяктар херектериниң сайыды албан-дужаалда Россияның Маадыры Буян Кууларны томуйлаанын таныштырган. Республика баштыңы аныяк удуртукчуну таныштырып тура, ооң арга-дуржулгазы, тура-соруу, төрээн черинге бердингени аныяктар херээнге чаа чедиишкиннерниң быжыг үндезинин тургузар боор деп, бүзүрелин илереткен. Буян Куулар – «Тываның маадырлары» регионалдыг кадрлар программазының киржикчизи.
«Буян Федоровичини томуйлааны – «Тываның маадырлары» программаның үре-түңнелдиг болганының тодаргай бадыткалы-дыр. Республиканың келир үези дээш харыысалганы хүлээнип алырынга белен ёзулуг удуртукчуларны болгаш патриоттарны өстүрери-биле бо төлевилел тургустунган. Бөгүн чаа сайыттан аңгыда, программаның өске ийи доозукчузу боттарының албан-дужаалдарында чедиишкинниг ажылдап, Тываның хөгжүлдезинге боттуг үлүг-хуузун киирип турар. Кижилерже, оларның эртем-билиглеринче болгаш төрээн черинге бердингенинче инвестицияны салыры – биске үре-түңнелдиг салыышкын-тыр» - деп, Владислав Ховалыг бодунуң телеграм-каналынга томуйлаашкынны тайылбырлаан.
Буян Куулар 1982 чылда Тыва АССР-ниң Чөөн-Хемчик кожууннуң Теве-Хая суурга төрүттүнген. Теве-Хая ортумак школазын дооскан, спортка, хостуг хүрешке идепкейлиг киржип чораан. Шериг албан хүлээлгезин мотоадыгжы шериг кезээнге эрттирген. 2007 чылдан бээр Тыва Республиканың ИХЯ-зынга ажылдаан. Красноярск хоорайга Россияның ИХЯ-зының Сибирьниң юридиктиг институдун 2021 чылда дооскан. 2022 чылдың ноябрьда хөй чыл ажылдааны дээш хүндүлүг дыштанылгаже үнген. 2023 чылдың чазынында Россияның Камгалал яамызы-биле керээни чаргаш, 55-ки гвардейжи мотоадыгжы бригадаже (дагжы) ажылдап кирген.
2023 чылдың майда ол тускай шериг операция зоназынга дайынчы даалгаларны күүседип эгелээн. Ол Донецк Улус Республиканың девискээринге Украинаның Чепсектиг күштери-биле дайынчы месилдежиишкиннерге киришкен. Ол украин шериглерниң кол пунктуларынче, удурланыышкын төптеринче болгаш өске-даа чугула объектилерже шаап халдаар дайынчы даалгаларны күүсеткен. Донецк Улусчу Республикада Пески биле Водяное суурларны база Авдеевка хоорайны хостаарынга киришкен. Коргуш чок, эрес-дидим чоруу дээш «Эрес-дидим чорук» ордени-биле шаңнаткан.
Дайынчы хүлээлгезин күүседип тура, эрес-дидим болгаш маадырлыг чоруун көргүскени дээш, Россияның Президентизиниң 2024 чылдың апрель 3-те чарлыы-биле Буян Кууларга күрүнениң болгаш чоннуң мурнунга ачы-хавыязын демдеглээн бистиң чуртта бедик ат – Россия Федерациязының Маадыры атты тывыскан.
Чаа томуйлаттынган сайыт Тываның Чазааның бо чылдың август айда бадылааны 2030 чылга чедир Аныяктар политиказын хөгжүдер стратегияның боттаныышкынын харыылаар. Документиде республикада хамаатыларның патриотчу сеткил-хөөннүг, бедик мөзү-бүдүштүг, харыысалгалыг салгалын белеткеп база кижизидеринче угланган аныяктар политиказының системазын 2030 чылга чедир хевирлээрин айыткан.
Стратегия аныяк салгалды, ылаңгыя көдээниң аныяктарын эки турачы болгаш хөй-ниити ажыл-херектеринче, патриотчу кижизидилге төлевилелдеринче, эртем-шинчилел ажылдарынче хаара тудуп, аңгы-аңгы угланыышкыннарда профессионал мергежилин хөгжүдүп, оларның өзүп сайзыраарынга байдалдарны тургузар ужурлуг деп, республиканың Баштыңы Владислав Ховалыг ооң мурнунда демдеглээн турган.