Улусчу фронтунуң регионалдыг салбыры Тыва Республиканың Чазаа-биле кады «Тиилелге дээш шупту!» федералдыг акцияны боттандырып, Тывадан шериг албанныгларга чорудар бо чылдың сөөлгү кышкы гуманитарлыг ачы-дуза чыылдазын дооскан. Ноябрь 12-де эгелээн акция-биле чыгдынган 20 тонна чүък республикадан Донецк уунче декабрь 16-да үнүптер.
Организаторларның чугаазы-биле алырга, шупту муниципалитеттер, организациялар, сайгарлыкчылар, волонтер пунктулары база буянныг чон орукче үнер чүъкче Лада Приора биле УАЗ "буханка" деп ийи машинаны, ийи мотоциклди, чаштынар четкилерни, генераторларны, чылыг пушкаларын болгаш чылыг идик-хептерни чыып, дамчыткан. Ол ышкаш Донда Ростов хоорайда Чаңгыс аай дүүштүрүлге төвүнче орун-дөжек херекселдерин болгаш аъш-чемни, Тываның шефке алганы ЛУР-нуң Свердловск муниципалдыг округтуң уругларынга чигирзиг белектерни чорудар.
Кышкы гуманитарлыг чыылдага Федералдыг кеземче күүселде албанының ажылдакчылары ТШО зоназынче чаа квадроциклди, Сүт-Хөл кожууннуң Кызыл-Тайга ортумак школазы оңгу лааларын, дайынчыларга чылыг чеңи чоктарны, аргаан уктарны, хол-хаптарын, 20 килограмм эътти дамчыдып, идепкейин көргүскен.
Чаа-Хөл кожууннуң чурттакчылары 400 хире кил хой эъдин, чылыг пушкаларын, дизельдиг болгаш инверторлуг генераторларны, автономнуг аккумлятор станцияларын, чылыг идик-хепти белекке берген. Кыргыс чоннуң ниитилели 55-ки аңгы гвардейжи мотоадыгжы бригаданың кезээнче дизельдиг чылыдылга пушкаларын, бензохирээлерни, чылыг галоштарны, эмчи херекселдерин, оңгу чаагайжыдар материалдарны чорудуп турар.
«Московскаяда стоматология» клиниканың төлээлери дайынчыларга чугула эм-таңны белеткээн. Красноярск хоорайда «Демнигде күштүг» волонтер пунктузунуң идепкейжилери 20 ажыг чаштынар четкилерни, генераторларны, чылыг пушкаларын, портативтиг зарядкаларны база шывыгларны дамчытканнар. Росреестрниң Тыва Республиканың эргелели «УАЗ Патриот» деп автомашинаны фронтуже чоруткан.
А бо дээрге Чаа чылдың гуманитарлыг чүъгүн чыырынга үлүүн киирген кижилерниң чүгле каш кезии-дир. «Номад» көдээ ажыл-агый рыногунуң сайгарлыкчылары ТШО зоназынче чорудар кылдыр эътти, колбаса кылыгларын болгаш өске-даа чүүлдерни эккелгеннер. А «Тываның эъди» бүдүрүлге бодунуң продукциязы — 500 ажыг банка какпактаан эътти хүлээткен. Армян диаспора шериглерниң дилээ-биле «УАЗ Патриот» автомашинага ийи комплект кышкы дугуйларны садып берген.
Элегес-Аксы суурнуң волонтёрлары чаштынар четкилерни, генераторну, шуруповертту, чылыг пушказын дамчыткан. Бии-Хем кожууннуң чурттакчылары эътти, аъш-чемни эккелген. Кызылдың 8 дугаар школазының өөреникчилери база чыылдага үлүүн киирип, Чаа чылдың үш он хире чигирзиг белектерин болгаш дайынчыларга изиг күзээшкиннерлиг чагааларны белеткеп чорутканнар.
Гуманитарлыг чүъктү Донецк хоорайда Чаңгыс аай дүүштүрүлге төвүнге дүжүрер. Тывадан шериглерлиг кезектерниң Командирлер чөвүлели шериг албанныгларга посылкаларны дамчыдып, хуваар.
Республикада шупту муниципалдыг тургузугларының чыгганы доңурган эъттерлиг 5 тонна кирер соодукчулуг ийи автомашиналар декабрьның 17-де орукче үнүптер. Шупту 6,5 тонна ажыг чүък үнер. Бирги чүък машиназы Донецкче углай, а эът болгаш гуманитарлыг дуза чүдүрген өске машина Курск обласче аъттаныптар.
Гуманитарлыг чүък декабрь 25-ке адрестеринге чеде бээрин Улусчу фронт дыңнаткан.