Владислав Ховалыг 1 шак 20 минута дургузунда үрүгүлчүлээн дорт дамчыдылга үезинде чаңгыс чер чурттугларының айтырыгларынга харыылаан. Оларның аразында дамчыдылга үезинде удуртукчуга дорт салган база почта, интернет, социал четкилер таварыштыр баш бурунгаар киирген айтырыглар бар.
Республиканың чурттакчылары бичии суурга көвүрүг тударындан эгелээш, Азия биле Европаның аразынга делегей чергелиг коридорларны тургузарынга чедир янзы-бүрү айтырыгларны сонуургаан. Республика баштыңы харылзааже үнген кижи бүрүзүнге долу харыыларны бээрин оралдашкан.
Ажы-төлдүң келир үези дээш сагыш човаан айтырглар база хөй болган. Көдээ черлерде школа өөредилгезиниң шынарын шыырак деңнелге тудар дээш чазак чүнү кылып турарын айтырган.Республика көдээ суурнуң башкызы федералдыг программага киржири-биле кызыгаарлаттынмайн турарын Владислав Ховалыг тайылбырлаан. Тыва көдээ суурларны шилип алган аныяк специалистерге субсидияны берип турар. Ол программаның ачызында 2021 чылдан бээр республиканың школаларынче 336 аныяк башкыларны хаара туткан.
Кызылдың чурттакчыларындан хөй-ниити транспортунга хамаарыштыр хөй айтырыглар келген. Ниитизи-биле байдал экижээн, Кызыл чоок-кавы девискээрлерде хөй-ниити транспорту-биле пассажирлер сөөртүлгезиниң системазын тургузуп, ажылдатканы көскү. Республиканың чазаа ооң мурнунда чүгле сайгарлыкчыларның ажыглап турганы муниципалдыг тургузуглар аразының маршруттарын катап ажыткан.
Автоматчыткан системаларга мал-маганын албан бүрүткедир дугайында айтырыглар көдээ чурттакчыларын дүвүреткен. Республика Баштыңы үндезин чок черге дүвүрээн ажыы чок деп оожургаткан. Ажыл-агыйларның ветеринарлыг хандырылгазынга база малдың продукциязын садып-саарарынга таарымчалыг байдалдарын тургузар дээш мал-маган учедунга чурумну киирери – малчыннарның боттарының сонуургалында.
Дорт шугумнуң киржикчилери республиканың Баштыңындан бокту үндүр сөөртүрүнүң айтырыгларын база салган. Владислав Ховалыг ол айтырыглар чоорту шиитпирлеттинип турарын чугаалаан. Бокту чыыр, шыгжаар болгаш болбаазырадыр бүдүн системаны тургузарының нарын ажылдары чоруп турар. 2026 чылда боктар аңгылаар завод – улуг турум бүдүрүлге ажылап эгелээр ужурлуг.
Владислав Ховалыг кем-херек үүлгедиишкиннеринге, хоойлуга удур арага садарынга демисел айтырыгларынга харыыларны берип, Кызылда болгаш республикада перспективтиг төлевилелдерни демдеглэээн. «2026 чылдан 2030 чылга чедир регионнуң комплекстиг хөгжүлдезинче угланган улуг хемчээлдиг тудуг болгаш капитал септелге ажылдары планнаттынган. 370 ажыг объектилерже ниитизи-биле 40,4 млрд ажыг рубльди көрген» - деп, ол чугаалаан.