Республикада 2024 чылда ажылдап эгелээн «Хорриот» федералдыг информация системазы регионда херек кырында малдың баш санында болгаш эрткен чылдарның статистика сан-чурагайларында элээн дүүшпес сан-чурагайлар барын илереткен.
Бо система ажыл-агыйларда бар малдың баш санын электроннуг реестрже киирерин негеп турар, ынчалза-даа мал ээлери ол ажылды ам-даа доозуп албаан.
Владислав Ховалыгның чугаазы-биле алырга, «Хорриот» система республикада мал ажыл-агыйларында малдың херек кырында баш санын тодарадып, мал-маганның өзүлдезин болгаш шимчээшкинин үре-түңнелдиг хайгаараар арганы берип турар.
2025 чылдың эгезинде Тываның шупту көдээ ажыл-агыйларында 99,69 муң баш чылгы, 176,54 муң баш улуг мыйыстыг бода, 696,68 муң баш хой, өшкү мал бүрүткеттинген. 2023 чылга деңнээрге, бода мал бажы 8 хууга база шээр мал бажы 29,2 хууга эвээжээн.
Владислав Ховалыг Тывада ышкаш, бүгү Сибирь федералдыг округдуң мал ажыл-агый адырында шак ындыг байдал тургустунганын демдеглээн. Сибирьниң шупту регионнарының девискээрлеринде улуг бода малдың баш саны 14 хууга, а шээр малдың баш саны 27,5 хууга кызырылган. Шак ындыг байдал Төп федералдыг округда база демдеглеттинген, 2021 чылдан 2024 чылдың төнчүзүнге чедир ында электроннуг чизени чоруткан соонда, шээр малдың баш саны 23 хуу, а улуг бода малдың баш саны 11 хуу эвээжээн.