Тываның Баштыңы Владислав Ховалыг Кызылдың чурттакчызының айтырыынга харыылап тура, Төп-Евразийжи транспорт коридору-биле Тываны таварты эртер демир-орук тудуунуң келир үезиниң дугайында дорт дамчыдылгага чугаалаан. Республика Баштыңы демир-орукту стратегтиг мурнады хөгжүдер орук деп демдеглээн.
«Төп-Евразийжи транспорт коридору, чүгле орук эвес-тир. Ол дээрге бистиң кызыгаар чоогунуң бүгү экономиказының судалы-дыр. Төп-Евразийжи транспорт коридору Тываны Евразийжи транспорт инфраструктуразының системазынче киирип, Соңгу чүк далай орууның азы Аравия далайның болгаш Индий океанның порттары-биле Арктика коридорун каттыштырар» - деп, Владислав Ховалыг демдеглээн.
Төлевилел херек кырында ажылдап эгелээнин ол дыңнаткан: Төп-Евразийжи транспорт коридорун тударынга баш бурунгаар техника-экономиктиг шинчилел ажылдары доостурунуң кырында келген. ПМЭФ-2025-тиң үезинде, Красноярск край, Хакасия болгаш Тыва меморандумга аттарны салып, «Стратегтиг шинчилелдер төвү» фондузу алызында чүък баазазын тударынга шинчилелдерни эгелээн.
Федералдыг деткимчези-биле Россияның демир-оруктары даштыкы партнерлар – Моол биле Кыдат-биле кады төлевилелди боттандырып турар. Россияның Президентизи Владимир Путинниң даалгазы езугаар ажылдарны шыңгыы хайгаарап турар.