Ноябрьда Тыва Россияның Бойдус яамызының шилилгезин эрткеш, 2,45 млрд ажыг рубль түңнү капиталдыг грант хевирлиг федералдыг бюджет субсидиязын алган. Төлевилелди кады акшаландырары-биле республика бюджединден 25 хире млн. рубльди тускайлаары көрдүнген.
Коммуналдыг бок болбаазырадыр адырда амгы үениң инфраструктуразын тудар болгаш, боктарны чок кылып база хөмер төлевилелдиң херек кырында күүселдези 2026 чылда эгелээр дээрзин Баштың демдеглээн.
Сөөлгү чылдарда республикада бо адырда тускай угланыышкынныг ажылды чоруп турар. Кадыг боктар үндүр сөөртүр «Транспорт ачы-дузазы болгаш төлевилел» КУБ регионалдыг операторнуң бодунуң автопарыгында 56 тускай техника бар. 2027 чылга чедир ам-даа 27 техника аймаан садып алыры планнаттынган.
Республикада кадыг коммуналдыг бок чыыр 4200 ажыг контейнер бар, оларның 486-зын бо чылын садып алган. Бо чылдың сентябрьда Кызылдың хөй квартиралыг бажыңнар девискээринге тургузар кылдыр 100 ажыг чук контейнерлерни саткан.
Сөөлгү чылдарда кайы хамаанчок бок төккен черлерни аштаар талазы-биле улуг ажылдарны чорудуп, 2,6 миллион кубометр ажыг бокту үндүр сөөрткен. Кадыг коммунал бокту үезинде үндүр сөөртүп турарын чурукка тырттыргаш, медээлерин федералдыг учет системазынче болгаш SmartRO программазынче дамчыдып берип турар. Бок сөөртүр шупту машиналар ГЛОНАСС системазында коштунган.