Владислав Ховалыг дорт харылзаа үезинде, Россияның Саң-хөө яамызы болгаш Тудуг яамызы Тыва Республиканың «Өг-бүле ипотеказы» программага онза негелделерни узадырын деткээнин дыңнаткан. Бир эвес ол негелделерни узадыптар болза, чылда 2 хуу деңнелдиг ипотека чээлизинге ставка 2026 чылда хевээр артар. Регионнуң чурттакчыларын деткиир ужурлуг бо шиитпир чуртталга байдалдарын экижидеринге идиг болур.
«2026 чылда чиигелделиг ипотека-биле 1000 керээни чарарынга чөпшээрелди чедип алдывыс» - деп, республика Баштыңы дыңнаткан.
Тываның Чазаа Программаны боттандырары-биле «Тыва Республиканың чурттакчыларын чедингир болгаш таарымчалыг чуртталга бажыңнары-биле хандырары» күрүне программазынга өскерилгелерни киирген доктаалдың төлевилелин белеткээн. Амгы үеде ол төлевилел Россияның Тудуг яамызының чөпшээрелин эртип турар.
Президент Владимир Путинниң деткимчези-биле Тывага чылда 2 хуу чиигелделиг ипотеканы 2023 чылдың сентябрьда бир дугаар киирген. 2,5 чыл дургузунда төлевилел күүселдези-биле 3000 хире өг-бүлелер чурттаар оран-саваны таарымчалыг негелделиг садып ап шыдаан.