Тыва Республика 2026 чылда регионга болуп эртер IV делегей чергелиг сарыг шажын шуулганынга белеткел ажылдарын чорудуп турар. Форумнуң хемчеглерин белеткеп, эрттиреринге дорт хамаарылгалыг яамылар, ведомстволар, культура, шажынчы болгаш өөредилге албан черлериниң төлээлери кирген оргкомитет неделя санында чыглып турар. Тываның Баштыңы Владислав Ховалыг ээлчеглиг хуралды бо удаада удуртуп эрттирген.
Ол бодунуң телеграм-каналынга хуралдың киржикчилери чаңгыс үзел-бодалга келгенин демдеглээн: шажын амгы ниитилелде сүлде-сүзүк өөредиин нептередиринге дузалаар. Амыдырал болгаш чурагайжыдылга дүрген шимчеп турар үеде, ол кончуг чугула. «Мөзү-шынар кижизидилгези болгаш үнелиг чүүлдерже чүткүл кол талалар бо-дур. Шажынчы езу-чаңчылдарны сургап өөредириниң дүрүмнерин тургузарынга, чүс-чүс чылдарның арга-дуржулгазын кадагалап арттырып тургаш, оларны өөредилге программаларынче шажынчы эвес, а культурлуг болгаш төөгүлүг өнчү кылдыр каттыштыргаш киирип болур» — деп, Владислав Ховалыг бижээн.
Август айда болуп эртер форум каш хонук уламчылаарын сагындыраалыңар. Ооң баш бурунгаар программазынче шажынчы, эртем, өөредилге, спортчу, культурлуг-хөглээшкин темаларынга элээн каш он-он хемчеглерни киирер кылдыр ажылдап кылып турар.
«Сүбедей» универсалдыг спорт комплекизи, «Түбтен Шедруб Линг» сарыг шажын хүрээзи, Тываның күрүне университеди форумнуң кол шөлдери апаар. Кол болуушкуннарның санында улуг театржыткан көргүзүг, буддизмниң ховар эдилелдериниң делгелгелери, эртем шөлдери, «Калмыкия-Тыва-Бурятия» найырал фестивалы, шиилер, билдингир тыва бөлүктерниң киржилгези-биле дириг хөгжүм концерттери бар. Хороо кылажы болгаш Буддизмниң Үш Эртинезинге хөгжүмнүг өргүл езулалы база планнаттынган. Амгы үеде программаны тодарадып, эдип, таарыштырып турар. 2026 чылдың февральда сөөлгү хевири тургустунар.
Бо чылдың сентябрьда Калмыкия Республикага III делегей чергелиг буддийжи форум эрткен болза, баштайгы ийизи Бурят Республикага болуп эрткенин сагындыраал. 2023 биле 2024 чылдарда Индия, Кыдат, Вьетнам, Таиланд, Мьянма, Шри-Ланка, Лаос, Непал, Моол, Бангладеш, Камбоджа база Бутан дээш, 14 даштыкы чурттарның делегациялары аңаа киришкен.
Тываның Баштыңы Владислав Ховалыг Тубтен Шедруб Линг хүрээзинде Россияның буддийжи университедин ажыдып турар байырлалга аалчы болуп келген Калмык Республиканың Баштыңы Бату Хасиковтан форумнуң чаңчылчаан эстафетазын хүлээп алган.
Бату Хасиков 3-кү делегей чергелиг буддийжи форумнуң демдээ - Будданың овур-хевирин, Бодхи ыяжын, ыдыктыг лотосту сиилбээн тураскаалды Владислав Ховалыгга белекке берген.
Владислав Ховалыг Тывага форумну бедик деңнелге организастаары-биле бүгү күжениишкиннерни салырын айыткан. Регионнуң баштыңы буддийжи форум чоннарның, делегейже көрүштүң, үнелиг чүүлдерниң демнежилгезин деткиир деп демдеглээн. Россия Федерациязының Президентизи Владимир Путинниң 2026 чылда чарлааны Россияның чоннарының чаңгыс деминиң чылының мурнады хөгжүдер угланыышкыннарынга база Национал политиканың чаа стратегиязын боттандырарынга ол дүгжүп турар.
2024 чылдың февраль 13-те Москвага буддийжи өөредилгени болгаш шинчилелдерни деткиир фондунуң Тургузукчулар чөвүлелиниң хуралынга IV делегей чергелиг сарыг шажын форумун Тывага эрттирер дугайында шиитпир хүлээп алдынган. Россияның Президентизи Владимир Путин 2024 чылдың сентябрьда республикага аалдап чорааш, бо эгелээшкинни деткээн.