Тыва Республиканың Прокуратуразын үшкү класстың күрүнениң юстиция чөвүлекчизи Евгений Борисович Ботвинкин удуртур. 2021 чылдан 2025 чылга чедир республика прокурору кылдыр ажылдаан Сергей Дябкинниң орнунга ол ажылдаар кылдыр томуйлаткан. Евгений Ботвинкин 1989 чылда прокуратура органнарынга бодунуң ажылчын базымнарын эгелээн, Тываның прокурору кылдыр томуйладыр мурнунда Ханты-Манси автономнуг округ – Юграның прокурору албан-дужаалга ажылдап турган.
РФ-тиң чиңгине прокурорунуң оралакчызы Сергей Зайцев республика прокуратуразының чаа удуртукчузун ажылдакчыларга албан езузу-биле таныштырар дээш чедип келген. Ужуражылгага Тываның Баштыңы Владислав Ховалыг, Тыва Республика талазы-биле кол федералдыг инспектор Александр Вавилихин, Дээди Хуралдың (парламентиниң) даргазы Каң-оол Даваа, Тыва Республиканың Дээди болгаш Арбитраж судтарының даргалары Валерий Ондар биле Аяс Таргын база регионда эрге-хоойлу камгалаар бүгү органнарның төлээлери киришкен.
Тываның Баштыңы Владислав Ховалыг хоойлу-дүрүм камгалалынга хайгаарал органының ролюн демдеглээш, республика прокуратуразының чаа удуртулгазы-биле регион Чазааның кады ажылдажылгазы салдынган даалгаларын чедимчелиг күүседир дээрзинге бүзүрелин илереткен.
«Прокуратура – корум-чурумну хандырар, хамаатыларның эрге-ажыын база регионнуң доктаамал хөгжүлдезин камгалаар кол институттарның бирээзи. Хоойлу-дүрүм быжыглалында, коррупцияга удур демиселде, социал чөптүг чорукту хандырарынга ооң ролю дыка улуг - деп, Тываның Баштыңы демдеглээн. - Евгений Борисовичиге салдынган сорулгаларын чедип алырынга чедиишкиннерни база күрүнениң мурнунда тургустунуп келген чидиг айтырыгларны шиитпирлээринге тура-сорукту күзедим».