Республиканың Баштыңы Владислав Ховалыг-биле хууда хүлээп алыышкынынга тускай шериг операциязынга мөчээн маадырның кадайы Евгения Каваа оолдары-биле келген. Ол ышкаш чаңчылчаан үнелиг чүүлдерни кадагалап арттырарынче угланган төлевилелин таныштырып келген Тываның гуманитарлыг болгаш тускай социал-экономиктиг шинчилелдер институдунуң эртем ажылдакчызы Артыш Монгушту республика баштыңы хүлээп алган.
Владислав Ховалыг бодунуң телеграм-каналында хууда хүлээп алыышкын аңаа чугула чугаалыг, дорт харылзаа болур деп демдеглээн.
Эрткен чылдың декабрьда тускай шериг операциязының үезинде ашаа амы-тынындан чарылган соонда, Евгения Александровна чеди ажы-төлүн чааскаан азырап чоруур. Суворов медалының, «Эрес-дидим чорук дээш» медальдың, «Дайынчы шылгарал дээш» медальдың (I база II чегезиниң) болгаш хөй санныг күрүне шаңналдарының эдилекчизи, тускай шериг операциязының киржикчизи Сай-Даш Юрьевич Каваа Төрээн чуртунуң эрге-ажыы дээш амы-тынындан чарылган.
Евгения Александровна ажы-төлүн Ада-чуртка кызыгаар чок албан болурунуң, эрес-дидим чоруктуң үлегер-чижээ апарган адазының алдар-адынга төлептиг кижилер кылдыр кижизидер дээш бүгү-ле күжениишкиннерни салып чоруур. Ажы-төл иезиниң кызыгаар чок ынакшылынга болгаш деткимчезинге бүргедип алган өзүп турар.
Республика баштыңы-биле ужуражылгага үш оглу – оолдары ийистери Данил биле Денис база Станислав-биле келген. Акышкыларның улуглары – студентилер, а бичиизи – алдыгы класста. Евгения Александровна оолдарның сонуургалдарын, келир үеде өөренир планнарын сонуургадып, оларның бүгү талазы-биле сайзыралынга деткимчени көргүзерин дилээн.
Владислав Ховалыг хөй ажы-төлдүг, эп найырадыг өг-бүлеге бар-ла деткимчени көргүзеринге беленин илереткен. Тываның Баштыңы бодунуң телеграм-каналында, интернационалчы Кавааларның өг-бүлези-биле ужуражыры аңаа онза хүндүткел-дир деп демдеглээн.
Хүлээп алыышкынның ийи дугаарында ТИГПИ-де аныяк эртемден, этнография секторунуң кол специализи Артыш Монгуш келгеш, өг-бүлеге хумагалыг, улуг салгалды хүндүлээр, төрээн черинге ынак болуру дээн ышкаш, тыва чоннуң үнелиг чүүлдерге үндезилеттинген «Эр сорук» деп оолдарның патриотчу кижизидилгеже угланган төлевилелин таныштырган. Шаандан тура тыва эр кижи эрес-дидими, дайынчы хей-аъды, эрес-дидим болгаш коргуш чок чоруу-биле алдаржып чораан. Төлевилелдиң автору тускай шериг операцияларының киржикчилери чаңгыс чер-чурттугларының маадырлыг чоруу-биле ол шынарларны бөгүнгү аныяк салгалга кижизидерин саналдап турар.
Владислав Ховалыг таныштырган чугула төлевилел үе-шаанда киргенин демдеглеп, эгелээшкинни деткиирин дыңнаткан.