Владислав Ховалыг аппарат хуралының үезинде, Чаа чылдың байырлал хемсеглерин эрттиреринден ойталаарын ажылчын коллективтерге сүмелээн. Тываның Баштыңы тускай шериг операциязы чоруп турар амгы үеде Чаа чылдың улуг хемчеглерин корпоративтиг шайлаашкыннар болгаш салюттар-биле эрттирери таарымча чок деп тайылбырлаан. Республика Баштыңы байырлалды өг-бүлези-биле эрттирерин кыйгырган.
«Амдыызында бистиң оолдарывыс, акыларывыс, адаларывыс мурнуку одуругда турда, бистиң кол сорулгавыс - шимээргеп байырлаары эвес, а бодалдарывыска болгаш ажыл-херектеривиске олар-биле кады болуру. Байырлалды чоок кижилери-биле эрттирерин кыйгырып, камнаттынган акша-хөреңгизин бистиң дайынчыларывска гуманитарлыг дуза кылдыр ажыглаарын кыйгырып тур мен. Быжыг турушту, хүндүткелди, бедик хей аътты көргүзээлиңер!» - деп, Владислав Ховалыг бодунуң Телеграм каналынга шиитпирин тайылбырлаан.
Эрткен чылдарда база Тывага шак ындыг шиитпирни хүлээп турганын сагындыраал, регионнуң шупту деңнелде эрге-чагыргазы уруглар байырлалдарын организастаарындан база чаштарга белектер садарындан аңгыда, Чаа чыл кежээлеринден ойталаан турган.
Республика Баштыңы уругларга ёлкалар, утренниктер, доштан хоорайжыгаштар дээш оон-даа өске чүүлдерни албан организастаарын дыңнаткан. Ол ышкаш ТШО киржикчилериниң өг-бүлелериниң ажы-төлүнче онза кичээнгейни салырын дааскан.
Чаа чылдың улуг байырлалдарынга болгаш фейерверктерге кызыгаарлаашкыннар чүгле Тывада кирген эвес, Ставрополь крайның, Башкирияның, Краснодар крайның, Ленинград облазының, Крымның база Чувашияның эрге-чагыргалары шак ындыг шиитпирлерни база хүлээп алган.