Россияда Эки турачының (волонтер хүнүн) хүнүн декабрьның 5-те демдеглеп эрттирип турар. Республика Баштыңы Владислав Ховалыг бодунуң албан езузунуң телеграм-каналынга Тывада ол шимчээшкинге киржип турар кижи бүрүзүнге байырны чедирген. Регионнуң удуртукчузу волонтерларны «өскелерниң аарышкызын дыңнап, оларның хереглелдерин эскерип, артык сөстер чокка харыыны берип билир, буянныг чорукка кезээде сеткил-сагыжы ажык» кижилер деп демдеглээн.
Владислав Ховалыг байыр чедириишкининде, Тывада эки турачы шимчээшкин көшкүн аймактарның үезинде-ле, кадыг-дошкун агаар-бойдустуг болгаш хоорук үедерде-ле тываларның аразында бот-боттарынга дузалажырының бижиттинмээн хоойлузун тургускан ханы дазылдыг төөгүлүг демдеглээн.
«Өгбелериниң ужур-чаңчылдарын аныяк салгал уламчылап сагып чорууру өөрүнчүг-дүр. Бистиң республикада ачы-буян чүгле сөстер эвес, а делегейни өскертиптер ажыл-херектер апарган 20 муң ажыг эки турачылар бар. Оларның аразында уруглар, аныяктар болгаш улуг назылыг кижилер бар. Олар шаңнал-мактал манавайн, дузага хереглелдиг черлерже боттары чедип келирлер. Эки турачылар – бистиң регионнуң көзүлбес маадырлары-дыр. Оларның ачызында кижилер чааскаан эвес деп чүвени билип, эки чүвеге бүзүреп, бурунгаарлаар күштү тып алырлар» - деп, ол демдеглээн.
Тываның Баштыңы кандыг-даа үеде дуза кадарынга белен чоруу, ажык сеткили болгаш сагыш човаачалы дээш, эки турачыларга өөрүп четтиргенин илереткен. «Амыдырал силерге база сагыш човаашкынны, чылыг-чымчакты, деткимчени эгидип бээр болзун!» - деп күзээн.
Республиканың Аныяктар херектериниң талазы-биле яамызы Кызылга Эки турачының хүнүнге тураскааткан «Доброфорум» деп регионалдыг хемчегни организастаан. Аңаа «Тиилелге» шимчээшкининиң мөңгүн волонтерлары, эмчи волонтерлар, кожууннарның аныяктар организацияларының төлээлери, тускай шериг операциязының хоочуннары дээш, бүгү республикадан 300 ажыг кижи киришкен.
Тыва Республиканың Чазааның Даргазының оралакчызының хүлээлгезин күүседип турар Алексей Сазан-оол форумнуң байырлыг ажыдыышкынынга киржип, чыылганнарга байыр чедирип, волонтер шимчээшкининиң хөгжүлдезинге оларның үнелеп четпес үлүг-хуузун демдеглээн.
Форумга интерактивтиг зоналарны организастаан. Чижээ, «Кадык камгалал адырында эки турачылар» бүгү-российжи хөй-ниити шимчээшкининиң регионалдыг салбыры киржикчилерге скандинав кылашты канчаар кылаштаарын тайылбырлап, өөредиглиг оюннарга кириштирип, Геймлихтиң болгаш өкпе-чүректи ажылдадырының техниказы кирген бирги дуза аргаларын өөреткен.
Тываның күрүне университединиң студент отрядтар штавы вотажыйлаашкын, тудуг, экологтуг ажылдар база ОБЯ-биле кады ажылдажылгалыг дилээшкин-камгалал бөлүктериниң хөй янзы ажыл-чорудалгазының угланыышкыннарын таныштырган.
Волонтерлар ээзи чок дириг амытаннарга дузалаарынче болгаш тускай шериг операциязының киржикчилериниң өг-бүлелеринге дуза кадарынче угланган «Шил чүрек» деп чоокта чаа эрткен мөөрейниң дугайында база хоочуннарга дуза кадар сорулгалыг ам болур «Харлыг десант» деп чаа акцияның дугайында таныштырган.
Делегей чергелиг сарыг шажыг шуулганының белеткелинге 600 хире эки турачыларның киржилгези херегин база дыңнаткан.
Волонтер шимчээшкининиң эң-не идепкейжилеринге шаңнал-макталдарны хемчег үезинде байырлыы-биле тывыскан. Форум шаңналдарлыг болгаш суй-белектерлиг квиз-оюн-биле доозулган. Волонтерлар викториналарга, автомат чазып-чыырынга, чогаадыкчы мөөрейлерге киржип, боттарын хынааннар.