Тывада ноябрьның сөөлгү он хонуунда хенертен сооп келгени, дош кежиглер оруун эртежик ажыдар арганы берген. Декабрь 4-те регионнуң ОБЯ регионалдыг эргелелиниң специалистери республиканың өсе черлери-биле Улуг-Хем кожууннуң Эйлиг-Хем суурну тудуштурган Улуг-Хем кежиин машиналарның шимчеп кежеринге чөпшээрээн. Амгы үеде кежиглеп ниитизи-биле 10 тоннадан хөй эвес деңзилиг машиналар эртер кылдыр кызыгаарлаттынган.
Кыш санында-ла республикада беш дош кежиглер ажыттына бээр. Эйлиг-Хем кежиинден аңгыда, Каа-Хем кожуунда Каа-Хемни кежир Бүрен-Аксы болгаш Бельбей кежиглери, Енисейни кежир Кызыл кожуунда Баян-Кольская кежилдир, Тожу кожуунда ийи кежиг: бирээзи Хамсара хемни кешкеш, удавас чес тывыжы эгелээр Ак-Суг деп черже бир кежиг, база Тожу кожуун төвүнче чедер орукту хандырган Тоора-Хем кежии бар.
Дош кежиглеп-даа, азы анаа дош кыры-биле чорааш серемчилелди кошкадып болбас дээрзин камгалакчылар республиканың чурттакчыларынга сагындырып турар. Анаа-ла тургустунган дош кежиглерни эртери хоруглуг деп тускай демдектерни тургускан болур. Бо хоругларны хажытканы машиналар болгаш кижилер айыыл-халаптарга таваржып болур.