Москвага Россия Федерациязының субъектилеринге эртем-чырыдыышкынныг туризм талазы-биле төлевилел шимчедикчизиниң түңнел хемчээ болуп эрткен. Россияда Эртем болгаш техниканың он чылының «Эртем- чырыдыышкынныг туризм» инициативазы езугаар ол хемчегни Россияның Өөредилге болгаш эртем яамызы, Россияның күрүнениң туризм болгаш сервис университеди-биле кады боттандырып турар. Ломоносов аттыг Москваның күрүне университединге «Студент туризм» деп делегей чергелиг форум-фестивальдың гранд-финалынга Тываның команда тиилээн. Республиканың Баштыңы Владислав Ховалыг регионнуң делегациязының тиилелгези-биле байырын чедирген.
«Москвага Тываның командазы бистиң республикада эртем- чырыдыышкынныг туризмни хөгжүдериниң перспективаларын дыка эки таныштырган. Жюри кежигүннери бистиң республиканың улуг турисчи арга-шинээн демдеглеп, эртем- чырыдыышкынныг туризм маршруттарны ажылдапдып эгелээрге ол оон-даа улуг ужур-уткалыг апаар деп демдеглээннер» - деп, Тываның Баштыңы бодунуң телеграм-каналынга дыңнаткан.
Өөредилге программазының доозулганының соонда, 38 регионнуң төлээлери боттарының регионнарында эртем- чырыдыышкынныг туризмни хөгжүдериниң хемчеглер планнарының төлевилелин («орук карталарын»), ол ышкаш Акселераторга ажылдаан түңнелдерин таныштырган.
Россия Федерациязының Чазааның, РФ-тиң Өөредилге болгаш эртем яамызының, күүсекчи эрге-чагырганың федералдыг органнарының, туризм адырында чогуур профессионал каттыжыышкыннар төлээлери эксперттиг жюри кежигүннери кылдыр ажылдаан.
Тыва Республиканы ол хемчегге Тыва Республиканың Өөредилге яамызының эртем килдизиниң начальниги Ольга Монгуш биле «Травел17.РУ» КХ-ниң туроператору база чиңгине директору Алла Кончук төлээлеп чорааннар.
ТР-ның Өөредилге яамызының Тыва Республиканың туризм талазы-биле күрүне комитеди-биле кады белеткээн Тывада эртем- чырыдыышкынныг туризмни хөгжүдериниң дугайында видеоролигин эксперт жюризинге көргүскен.
Оон аңгыда Ольга Монгуш Тыва Республикада эртем-чырыдыышкынныг туризмни хөгжүдер «орук картазын» таныштырган. Регион чазааның деңнелинде ведомстволар аразының тускай ажылчын бөлүү тургустунганын, ооң ачызында Тывада эртем- чырыдыышкынныг 14 турисчи объектизи бүгү-российжи реестрже киргенин, ам 14 объектини кирер деп планнаттынганын дыңнаткан. Тываның Өөредилге яамызы Тываның күрүне университединиң, Тываның гуманитарлыг болгаш тускай социал-экономиктиг шинчилелдер институдунуң, Эмчи-социал айтырыглар болгаш удуртулга талазы-биле эртем-шинчилел институдунуң, Биосферлиг шинчилелдер төвүнүң эртем ажылдакчыларның киржилгези-биле дөрт шенелде эртем-чырыдыышкынныг маршруттарны ажылдап кылыр ажылды организастаан. Россияның Өөредилге болгаш эртем яамызынга маршруттар хыналданы эрткен соонда, ажылдап эгелээр.
Тываның командазы ажылын таныштырып, камгалаан соонда, Гранд-финалга киржир 38 регионнуң аразындан шилиттинген 15 регионнуң санынче кирген.
«Тыва Республиканың Өөредилге яамызы биле Тыва Республиканың туризм талазы-биле күрүне комитединиң демниг ажылының, ол ышкаш Тываның эртем албан черлериниң ажылдакчылары – бистиң эртемденнеривистиң ажылы болгаш идепкейлиг киржилгези-биле бо тиилелгени чедип алган бис» - деп, Ольга Монгуш демдеглээн.
Владислав Ховалыг Тываның төлээлериниң тиилелгезин дыңнадып тура, эртем-чырыдыышкынныг туризм республиканы чаа талазындан ажыдып, ооң хөгжүлдезинге күштүг идиг апаар дээрзинге бүзүрелин илереткен.