Тываның найысылалынга республиканың Хөй-ниити палатазының организастааны Коммерцияга хамаарышпас организацияларның хамааты форуму болуп эрткен. Форумга хөй-ниити каттыжыышкыннарының, эрге-чагырга органнарының болгаш бизнестиң, активчилерниң төлээлери болур 200 ажыг киржикчилер чыглып келгеш, хамааты ниитилел биле күрүне албан черлериниң аразында кады ажылдажылга айтырыгларын сайгарган.
Тываның Хөй-ниити палатазының даргазы Алесия Бажина форумну ажыткаш, регионда социал ужур-уткалыг айтырыгларны шиитпирлээринге болгаш чурттакчыларның амыдырал-чуртталгазының шынарын бедидеринге коммерцияга хамаарышпас организацияларының болгаш эрге-чагырганың күжениишкиннерин каттыштырары чугула дээрзин демдеглээн. Киржикчилер Тывада коммерцияга хамаарышпас организацияларның эгелээшкини-биле таарымчалыг хүрээлелди тургузарының, хөй-ниити шөлдерин чаагайжыдарының эң эки арга-дуржулгазын көргеннер.
Психологтар ассоциациязының, Чурагайлыг эде тургузуушкун төвүнүң, Аныяк малчыннар эвилелиниң болгаш регионалдыг өске-даа каттыжыышкыннарының төлээлери форумга сөстү алганнар. Оларның хөй кезии коммерцияга хамаарышпас организацияларның киржип болур төлевилелдериниң аргаларын калбартырын, ылаңгыя регионалдыг социал эгелээшкиннерже оларны идепкейлиг хаара тудар херек деп чугаалаанын демдеглээри чугула.
Кол программадан аңгыда, форум үезинде шүүгү яамызының, үндүрүг инспекциязының, статистика эргелелиниң болгаш өске-даа ведомстоларның специалистери отчетту белеткээриниң, юридиктиг чер эрге-байдалды алырының база ажыл-чорудулганың өске-даа чугула талаларының талазы-биле консультацияларны болгаш мастер-класстарны эрттирген.
Тываның эрге-чагыргазы хамааты эгелээшкиннерни боттандырарынга болгаш ниитилелдиң мурнунга тургустунуп келген эң нарын айтырыгларны шиитпирлээрде, коммерцияга хамаарышпас организациялар шимчээшкинин хөгжүлде дээш кады идепкейлиг ажылдаар дузалакчызы кылдыр көрүп турар.
Республикада грантылар-биле төлевилелдерни акшаландырып, ооң киржикчилеринге күрүне шаңналдарын болгаш хүндүлүг аттарны тыпсыры дээш, коммерцияга хамаарышпас организацияларны деткиир система тургустунган. Тываның Баштыңы 2025 чылда хөй-ниити организацияларынга грант деткимчезин көргүзер фондунуң акшаландырыышкынынче 13 млн хире рубльди тускайлаан.
Россияның Хөй-ниити палатазы Тываның коммерцияга хамаарышпас организацияларының ажылын бедии-биле үнелеп, республиканы «коммерцияга хамаарышпас дыка күштүг болгаш демниг организацияларлыг» регион деп демдеглээн. Тываның коммерцияга хамаарышпас организациялары регионнуң хөгжүлдезинче экономиктиг үлүг-хууну киирип турары-биле федералдыг рейтингиде 19-ку, ажыл-чорудулгазы-биле 20-ги черде турар.