Президентиниң эгелээни «Кадык камгалалы» национал төлевилел езугаар 2021 чылда эгелээн кадык камгалалының бирги звенозун эде чаартыр улуг программаның бирги чадазы бүгү чуртта ышкаш, Тывада база доозулган. Тываның Баштыңы Владислав Ховалыг албан езузунуң Телеграм каналында ооң дугайында дыңнаткан.
Бо үениң дургузунда республикада улуг ажылдар чоруттунган. Күрүне деткимчези-биле 2024 чылга чедир Тываның суурларында 24 фельдшер-акушер пунктулары база 10 эмнелге амбулаториялары туттунган, 16 эмнелге албан черлеринге капитал септелгени кылган. 2025 чылда 10 ФАП база 2 эмнелге амбулаториязы туттунуп, 5 оран-савада улуг септелге ажылдары чоруп турар, ооң иштинде 3 объектиде ажылдар доозулган, а артканнарында ол төнчү чадазынче кирген.
«Техниктиг баазаны чаартыры онза чугула: 574 санныг эмнелге дериг-херекселдерин, ооң иштинде республикада ооң мурнунда чок турган сөөк системазының быжыын хынаар денситометр, маммография аппараттары, сан-чурагайлыг рентген аппараттары дээш, оон-даа өске херек чүүлдерни саткан. Кезиишкин өрээлдерин чаартканы, кожууннар аразының эмнелге төптеринге чаа кезиишкиннерни кылыр арганы берген» - деп, Владислав Ховалыг демдеглээн.
Ол улуг эгелээшкиннер-биле регионнуң эмнелге албан черлеринге 87 чиик машиналарны садып алгаш, шимчеп албас кижилерге эмчи дузазының чедирерин экижидип, бажыңнарже чедериниң шынарын бедидип, эмнелге ажылдакчыларының ажылын чиигеткен.
«Узун болгаш идепкейжи назын» национал төлевилелдиң эде тургузуушкун программазының чаа чадазы 2026 чылда эгелээш, 2030 чылга чедир уламчылаар. Тывада ол программа-биле кадык камгалалының 14 модульдуг объектилерин тудуп, 20 оран-савага капитал септелгени кылып, 333 санныг эмчи дериг-херекселди садып алыры планнаттынган.
«Республиканың чурттакчы чонунуң кадыкшылынга болгаш узун назылаарынга оон-даа таарымчалыг байдалдарны тургузуп, ажылды ам-даа уламчылап, кады күжениишкиннеривис-биле сорулгаларывысты чедип алырывыска бүзүрээр мен» - деп, Тываның Баштыңы Владислав Ховалыг демдеглээн.