Ноябрьның сөөлгү улуг-хүнүнде Россияда Иелер хүнүн демдеглеп турар. 1998 чылда президентиниң чарлыы-биле «ие-чаштың социал ужур-утказын бедидер дээш» бо байырлалды тургускан. Беш чыл бурунгаар, 1993 чылда, регион чазааның эгелээшкини-биле, Якутияга Иелер хүнүн бир дугаар демдеглеп эгелээн. Ооң соонда Башкортостан биле Челябинск облазы аңаа каттышкан. Күрүне Думазының депутады, Херээженнер, өг-бүле болгаш аныяктар айтырыгларының талазы-биле комитет кежигүнү Алевтина Апарина Иелер хүнүн бүгү чурттуң байырлалы кылдыр чарлаарын саналдаан.
Тываның Баштыңы Владислав Ховалыг республиканың херээжен чонунга Иелер хүнү-биле байырны чедирген. Регионнуң удуртукчузу социал четкилерде байыр чедириишкининде ол хүннү «ынакшыл болгаш өөрүп четтирген-биле долган байырлал» деп демдеглээн.
«Ава – бүгү назынывыста ынакшылы-биле бүрген алган чөлеңгииш болгаш мерген угаанның үндезини-дир. Силер ажы-төлге шынчы чорукту, кээргээчел чорукту, долгандыр хүрээлелге хүндүткелди оттуруп, быжыг өг-бүлениң езу-чаңчылдарының болгаш үнелиг чүүлдериниң үндезиннерин салып турар силер» - деп, Владислав Ховалыг демдеглээн. База ол ышкаш республикада шупту аваларга кызымакай чоруу база хүн бүрүде ажылы дээш сеткилиниң ханызындан өөрүп четтиргенин илереткеш, быжыг кадыкшылды, сагыш-сеткилинге оожургалды, өг-бүлеге чаагай чорукту күзээн. «Ынакшыл болгаш өөрүп четтириишкин хүн бүрүде силерни чылыдып чорзун» - деп, ол түңнээн.
Тывага Иелер хүнүнде хөй санныг хемчеглерни, ооң иштинде өөредилге, чыдыдыышкын, культурлуг, спортчу хемчеглер-биле эрттирери чаңчыл апарган. Мурнуку одуругда дайынчыларывысты деткип чоруур херээжен чонну хүндүлеп демдеглээн «Тылдың ишчизи – фронтуга» деп форумну пятница эрттиргени кол болуушкун болган. Чыылганнар Ада-чурттуң Улуг дайынының үезинде ышкаш, бөгүн база Тиилелгени чоокшуладырынга бодунуң үлүг-хуузун киирип чоруур кижилерге хүндүткелди көргүскен. Форум үезинде тыва иелериниң ыдыктыг дүрүмнерин сактып, мөчээн дайынчыларга сактыышкынның минутазын чарлаан.
Байырлал хүнүнүң бүдүүзүнде, республиканың чазаанга, Тываның онза иелериниң бирээзи – Россия Федерациязының Маадыр иези Айнааш Ондарны тускай демдеглээн. Бо чылын ооң өг-бүлези Бүгү-россия чергелиг «2025 чылдың өг-бүлези» мөөрейге «Хөй ажы-төлдүг өг-бүле» деп бөлүкке тиилээн. Владислав Ховалыг Хөй ажы-төлдүг ава болгаш ооң ажы-төлү-биле ужурашкан. Маадыр ие-биле хөй ажы-төлдүг өг-бүлелерни деткиириниң регионалдыг болгаш федералдыг деңнелде хемчеглерин база программаларны сайгарып, белек кылдыр үш өрээлдиг квартираның сертификадын аңаа тывыскан.
Ол-ла хүн, Национал театрга Иелер хүнүнге тураскааткан «Кадын-2025» деп республиканың авалар мөөрейиниң төнчү кезээ болуп эрткен. Кадын ат дээш Тываның шупту муниципалдыг тургузугларындан 20 киржикчи демисешкен.