Кызылга Россияның кубогу дээш спортчу хүреш маргылдаазы доозулган. Тыва Республиканың чыында командазы сөөлгү оюннарга 23:20 сан-биле тиилээш, тиилелгени чаалап алган. Тываның Баштыңы Владислав Ховалыг мөгелерниң чедиишкиннери-биле байырны чедирген.
«Дагестанның командазы-биле сөөлгү оюнга бистиң спортчуларывыс кайгамчык мөзү-бүдүштү, тиилелгеже чүткүлдү, бедик арга-дуржулгазын көргүстү. Салыг бүрүзү езулуг тулчуушкун болган, ынчалза-даа шиитпирлиг оюннарга бистиң оолдарывыс бедик хей-аъдын болгаш техниказын бадыткап, команда маргылдаазынга ниити тиилелгени биске чаалап эккелди» - деп, республиканың Баштыңы бодунуң блогунда бижээн
Тываның чыынды командазы Дагестан Республиканы 23-20 сан-биле уткан. Саха Республика (Якутия) командазы 7-3 санныг болуп, үшкү черни ээлээн. Дөрткү черни Москваның мөгелери алганнар.
Тыва биле Дагестан мөгелерниң аразынга төнчү оюннар эң дүшкүүрлүг болган. Ылаңгыя 92 кил чедир деңзилиг мөгелер аразынга ужуражылга шыңгыы эрткен. Бо сегиржип алыышкынга тыва мөге Соруктуг Калин-оол кайгамчык быжыг турушту болгаш арга-дуржулгазын көргүзүп, бодунуң командазынга түңнел саннарны чаалап эккелген.
Тыва Республиканың чыынды командазының составында делегей чергелиг мастерлер, бүгү-российжи болгаш делегей чергелиг маргылдааларның чемпионнары болгаш шаңналдыг черлериниң эдилекчилери: Амир Чамзын (57 кг), Кежик Монгуш (61 кг), Чаяан Монгуш (65 кг), Сайын Казырык (70 кг), Арбак Сат (74 кг), Чимит-Доржу Бады (79 кг), Баяр-Сайхан Бады (86 кг), Сорукту Калин-оол (92 кг), Бады-Маадыр Самдан (97 кг), Айдың Монгуш (125 кг) хүрешкеннер.
Тыва Республиканың Спорт яамызы аңгы-аңгы деңзилерге мөгелерниң сөөлгү хүрежиниң түңнелдерин парлаан:
57 кил деңзиге Чамзын Амир (Тыва Республика) - Сайпудинов Магомед (Республика Дагестан). Чамзын 11:1 сан-биле тиилээн.
61 кил деңзиге Монгуш Кежик (Тыва Республика) - Магомедов Халид (Дагестан Республика). Монгуш 14:4 сан-биле тиилээн.
65 кил деңзиге Монгуш Чаяан (Тыва Республика) - Ахмадудинов Эльдар (Дагестан Республика). Ахмадудинов 1:7 сан-биле тиилээн.
70 кил деңзиге Казырык Сайын (Тыва Республика) - Клименко Сергей (Дагестан Республика). Казырык 11:1 сан-биле тиилээн.
74 кил деңзиге Сат Арбак (Тыва Республика) - Мурадов Рамазан (Дагестан Республика). Мурадов 2:7 сан-биле тиилээн.
79 кил деңзиге Бады Чимит-Доржу (Тыва Республика) - Касумов Касум (Дагестан Республика). Касумов 0:11 сан-биле тиилээн.
86 кил деңзиге Алаш Монгуш (Тыва Республика) - Шамиров Али (Дагестан Республика). Шамиров 0:4 сан-биле тиилээн.
92 кил деңзиге Калин-оол Сорукту (Тыва Республика) - Алиев Шамиль (Дагестан Республика). Калин-оол 9:- сан-биле тиилээн.
97 кил деңзиге Самдан Бады-Маадыр (Тыва Республика) - Тажудинов Гаджимагомед (Дагестан Республика). Самдан 2:0 сан-биле тиилээн.
125 кил деңзиге Монгуш Айдын (Тыва Республика) - Зайнутдинов Багаутдин (Дагестан Республика). Зайнутдинов 2:12 сан-биле тиилээн.
Владислав Ховалыг мөгелерге, оларның тренерлеринге, республиканың бүгү спортчу ниитилелинге өөрүп четтиргенин илереткен:
«Бо төлептиг шаңнал дээш мөге бүрүзүнге, оларның тренерлеринге, бистиң бүгү спортчу штабка өөрүп четтирдим. Тыва дээрге – күчүлүг күш, российжи спортта чемпионнарны каңнап өстүрер чер апарган дээрзин база катап бадыткадыңар» - деп, ол бижээн.
Маргылдааны Россияның спортчу хүреш федерациязы, Тыва Республиканың Спорт яамызы, Тыва Республиканың спортчу хүреш федерациязы организастаан. Россияның Кубогу дээш спортчу хүреш маргылдаазы Тывага бир дугаар болуп эрткен.