Кызылдың Аныяктар ордузунга аныяк хамаатыларны каттыштырып, амы-хууда харыысалгага, фашисчи болгаш экстремисчи чоруктан хостуг ниитилелди тургузарынче угланган ажык чугаалыг «Тайбың болгаш эп-найырал дээш» регионалдыг аныяктар форуму эртип турар. Шуулганның ажылында студентилер болгаш янзы-бүрү чоннарның база шажын чүдүлгелерниң төлээлери киржип турар.
Националдар херектериниң талазы-биле регионалдыг агентилелиниң директору Светлана Ощепкова аңгы-аңгы чоннар болгаш шажын чүдүлгелер аразында эп-найыралды быжыглаарынга кады ажылдаарының чугулазын шуулганның киржикчилеринге чугаалаан.
«Тыва Республиканың чурттакчы бүрүзүнүң турум хөгжүлдезинге байдалдарны кады күжениишкиннеривис тургузуп шыдаар бис дээрзинге бүзүрээр мен» - деп, ол демдеглээш, кижи бүрүзүнге үре-түңнелдиг ажылды, солун дискуссияларны, келир үеде чедиишкиннерже тура-сорукту күзевишаан, чаа идеялар болгаш төлевилелдерниң эгелээшкини болур шуулганның чугулазы ында деп айыткан.
Регионда-даа, бүгү чуртта-даа националдар болгаш шажыннар аразының харылзааларын быжыглаарынга хамаарышкан кол айтырыгларны база чугаалашкан. Чер-чурт шинчилекчизи Татьяна Верещагина күрүне ажылдакчылары Монгуш Буян-Бадыргы биле Иннокентий Сафьяновтуң чижээн киирип, найырал болгаш бот-боттарын билчир чорук төөгүде улуг ажыл-херектерниң база эде тургузукчу эгелээшкиннерниң үндезини болганын онзалап демдеглээн.
Тывада Россияның чоннар Ассамблеязының чанында Аныяктар чөвүлелин тургузарын чарлааны - ол хүннүң кол болуушкуннарының бирээзи болган. Организацияның регионалдыг салбырының даргазы Вера Лапшакова чаа чөвүлелдиң сорулгазын болгаш хөй-ниити амыдыралынга аныяктарның идепкейлиг киржиринге кандыг аргаларны берип турарын чугаалаан.
Юстиция яамызының, Тываның ИХЯ-ның экстремизмге удур демисел төвүнүң, Россияның «Билиглер» ниитилелиниң төлээлери шуулганның киржикчилеринге "Телефон мегелээшкининге удур демисел", "Экстремизмге удур профилактика", "Интернетте чурагайлыг гигиеназы болгаш хууда айыыл чок чорук" деп темаларга өөредилге сессияларын, мастер-класстарны, оюннарны эрттирген.