Тываның Баштыңы Москвага федералдыг арга-арыг ажыл-агый агентилелиниң удуртукчузу Иван Советников-биле ужурашкаш, өртке удур сезон канчаар канчаар эрткенин чугаалашкан. Ооң дугайында Владислав Ховалыг бодунуң Телеграм каналынга дыңнаткан. Ужуражылга үезинде 2026 чылда республиканың арга-арыын өрттерден камгалаарынга акшаландырыышкын айтырыын дугурушкан.
Иван Советников республиканың баштыңы-биле чугаалажып тура, Тыва арга-арыг өрттериниң девискээри элээн кызырылган дээрзин демдеглээн. Арга-арыг өрттериниң шөлү 2,5 катап кызырылган – 2024 чылда 44,9 муң га турганындан 2025 чылда 18,4 гада келген. Ниитизи-биле 179 арга-арыг өрттерин өжүрген.
«Ындыг болзажок, дараазында арга-арыг өрттериниң сезонунда ажылдың темпизин кошкадып болбас. Онза кичээнгейни арга-арыг өрттерин болдурбазынче база өрттерниң үнген кол дөзү кижилерниң буруузунда болганда, чурттакчы чон-биле профилактиктиг ажылдарны чорудар херек» - деп, Россияның арга-арыг агентилелиниң удуртукчузу сүмелээн.
Тываның Баштыңы биле федералдыг арга-арыг агентилелиниң удуртукчузу арга-арыг фондузун өрттерден камгалаары-биле 2026 чылда планнаттынган хемчеглерни акшаландырарының хемчээлин дугуржуп алганнар. Владислав Ховалыгның дыңнатканы-биле алырга, ол сорулгага республикага 316,9 млн рубльди тускайлаан, 2025 чылга деңнээрге 40,4 млн хөй. Арга-арыгны өртке удур дериг-херекселдер-биле чепсеглээринче база өрт айыылын черден база агаардан шинчилээринче база арга-арыг өрттерин өжүреринче ол акша-хөреңгини угландырар.