Тываның Баштыңы «Креативтиг экономика» автономнуг коммерцияга хамаарышпас организацияның президентизи Марина Монгуш-биле ажыл-агыйжы ужуражылганы эрттирген. Ийи тала видеохарылзаа хевиринге эрткен ужуражылга үезинде хөөмейни сайзыраңгайжытпышаан Тыва Республикага чогаадыкчы адырларны хөгжүдериниң алыс аргаларын сайгарган. Ол ужуражылгага регионда креативтиг экономиканы бүгү талалыг хөгжүдер «орук картазының» кол чадазы болур «Хөөмей» делегей академиязының баазазынга продюсер төвүн ажыдар төлевилелди таныштырган.
Владислав Ховалыг республиканың чогаадыкчы сектору доктаамал өзүлдени көргүзүп турарын дыңнаткан — сөөлгү чылдарда республиканың экономиказынче ооң киирген үлүг-хуузу ийи катап көвүдээн. Бо дээрге долу хөгжүлдениң чүгле эгези-дир.
Регион Баштыңының чугаазы-биле алырга, бир дугаарында кайгамчык культурлуг өнчүвүс – хөөмей республиканың чижилгелиг кол стратегтиг курлавыры апаар. Делегей чергелиг шөлдерге ону нептередиринге республиканың «Хөөмей» делегей академиязының баазазынга ажыдар продюсер төвүнүң төлевилелин ажылдап кылган. Төлевилелди боттандырар кол планче амгы үениң үн бижидер студиязын ажыдары, башкарыкчы коллективтерниң альбомнарын бижиткеш, үндүрери, Кызылга делегей чергелиг гастрольдарны болгаш улуг фестивальды организастаары, даштыкыларга онлайн-школа болгаш чайгы курстарлыг өөредилге программаларын ажылдап кылыры кирген.
Төлевилел боттандырылгазының кол угланыышкыны – турум хөгжүлдени база делегейге таныттынгыр апаар ужур-чаңчылдар болгаш чаартылгаларны чаңгыс аайлап, хөгжүм, өөредилге, коммерциялыг ажыл-чорудулганы каттыштырып, чаңгыс аай системаже регионнуң имиджизин нептередир.
Ооң-биле чергелештир, 2030 чылга чедир креативтиг индустрияны хөгжүдериниң стратегиязын бадылаар, республика Баштыңының удуртулгазы-биле тускай чөвүлелди тургузар, Стратегтиг инициативалар агентилели-биле дугуржулганы чарар ажылдар чоруп турар.
Владислав Ховалыг ол эгелээшкиннерни боттандырарынга «Креативтиг экономика» АНО-нуң деткимчези Тываның чогаадыкчы делгем эжиин ажыдып, амгы үениң аргалары-биле байыткан регионнуң онзагай культуразы чүгле Россияда эвес, а делегей рыногунда бодунуң шын туружун тып алыр боор деп бүзүрелин илереткен.
Биче болгаш ортумак сайгарлыкчы чоруктуң чаңгыс аай реестриниң медээзинден алырга, Тыва Республикада 10 муң ажыг биче болгаш ортумак сайгарлыкчы чорук субъектилери бүрүткеттинген, оларның 400 хирези, азы 4,6 хуузу кол ажыл-чорудулгазы кылдыр креативтиг экономиказынга хамааржыр угланыышкыннарны: гастрономия, реклама болгаш пиар, программа хандырылгазы, арт-индустрия, дыштанылга болгаш хөглээшкинни айыткан.
«Бистиң сорулгавыс – үн бижидер амгы үениң студиязы, бистиң коллективтерниң даштыкыже гастрольдарындан эгелээш өөредилге программаларынга чедир республикага долу экосистеманы тургузары. 2026 чылдың ортаандан бээр ажылдарны чоорту чорудар. Ол чаа ажылчын олуттарны база инвестицияларны бээр, а бистиң культуравыс бүгү делегейге оон-даа күштүг дыңналы бээр» - деп, Владислав Ховалыг ужуражылга соонда бодунуң блогунда дыңнаткан.