Тываның Баштыңы Владислав Ховалыг Москвага ажыл-агыйжы сургакчылаашкын үезинде Россия Федерациязының Чазааның Даргазының бирги оралакчызы Денис Мантуров-биле ужурашкан. Регионнуң удуртукчузу социал четкилерде бодунуң арынында ону дыңнаткан.
Чазак Даргазының бирги оралакчызы-биле үлетпүр, энергетика, транспорт инфраструктуразында чугула төлевилелдерни боттандырар, регионнуң стратегтиг хөгжүлде айтырыгларынга федералдыг чазак-биле республиканың кады ажылдажылгазын чугаалашканын Владислав Ховалыг дыңнаткан.
Кызыл агломерациязының энергетика инфраструктуразын хөгжүдеринче онза кичээнгейни угландырган. Владислав Ховалыг 2021 чылдың декабрьда РФ-тиң Чазааның бадылааны регионнуң үлетпүр болгаш социал адырларында инвестиция төлевилелдерин энергия-биле хандырарының комплекстиг планының чорудуун Мантуровка илеткээн. Бо чылын «Россети» компания ол планның күүселдези-биле Тываның төп болгаш чөөн кожууннарын база регионнуң найысылалын чырык энергиязы-биле хандырар 220 кВ «Туран» биле «Кызылская» подстанцияларны эде чаартканын сагындыраал. Чаарттынган объектилер Россияның эң улуг электростанциязы – Саян-Шушенская ГЭС-тен регионче немелде энергияны дамчыдарынга, улуг хемчээлдиг инвестиция төлевилелдерин боттандырарынга, кижилерниң амыдырал-чуртталгазының шынарын бедидеринге, регионнуң арга-шинээн ажыдарын хандырарынга арганы бээр.
Владислав Ховалыгның чугаазы-биле алырга, «Амыдыралга инфраструктура» национал төлевилелдиң «Хөй-ниити транспортун хөгжүдери» федералдыг төлевилелди республикага боттандырары ужуражылганың база бир айтырыы болган. Тываның Баштыңының 2024 чылдың төнчүзүнде Тывада хөй-ниити транспорун чаартырының деңнели 48 хуу болган деп демдеглээн. Бөгүнде тус чер бюджединиң акшаландырыышкынының болгаш «Сбербанк Лизинг» компания-биле чарган лизинг керээлериниң ачызында ол көргүзүг 60 хуу чедир өскен. «Шимчеп чоруур составты чаартырын уламчылаар бис – 2030 чылга чедир ол көргүзүг 85 хуу чедер ужурлуг» - деп, Владислав Ховалыг демдеглээн.
Оон ыңай Тываның Баштыңы федералдыг Чазак Даргазының бирги оралакчызы-биле Төп-Евразия транспорт коридорунга келир үеде чүък баазазын тургузар айтырыгны чугаалашкан. Амгы үеде Төп-Евразия транспорт коридорунуң техниктиг-экономиктиг үндезинин ажылдап кылып турар. ПМЭФ-2025-те Красноярск край, Хакасия болгаш Тыва меморандумга атты салган, ол езугаар «Стратегтиг шинчилелдер төвү» фондузу чүък баазазының перспективазын санап эгелээн. Денис Мантуровтуң эгелээшкини-биле тургустунган ажылчын бөлүк техниктиг даалганы бадылаан.
Президент Владимир Путин Россияның чаа стратегтиг хөгжүлде угланыышкыннарының бир кезээ кылдыр Төп-Евразия транспорт коридорун тургузарының алыс кедизин тодарадыр даалганы берген. Төп-Евразия транспорт коридору Енисей хем таварты Соңгу чүктүң далай оруунче чүък сөөртүрүнүң немелде аргаларын берип, Торгу оруунуң чаа соңгу чүк адырын тургузарының үндезинин тургузуп турар.
РФ-тиң Чазааның Даргазының бирги оралакчызы Денис Мантуров бо чылдың июльда Тывага кээп чораанын сагындыраал. Ол чорааш, регионнуң бүдүрүлге күчү-күжүн болгаш кол даг-тывыш төлевилелдериниң боттаныышкынын хынап, ол ышкаш республиканың баштыңы Владислав Ховалыг-биле ажылчын ужуражылганы эрттирген.