Тываның Баштыңы бодунуң албан езузунуң блогунда декабрьның 11-де 17:00 шакта «Россия 24» телеканалдың эфиринге ооң киржилгези-биле дорт дамчыдылга болурун дыңнаткан. «Вконтакте» социал четкиде Владислав Ховалыгның арынынга база ону дамчыдар. Амгы үеде айтырыгларны чыып, аайлап, оларны ажылдап турар.
«Республиканың хөгжүлдезинге болгаш чурттакчы чоннуң база өг-бүлелерниң амыдыралынга хамаарышкан амгы үениң айтырыгларын аңаа сайгарып чугаалажыр бис. Ол ышкаш чылдың кол түңнелдерин үндүрүп, келир чылдың планнарын тургузар» - деп Тываның баштыңы дорт шугумнуң айтырыгларын дыңнаткан.
Тываның регион башкарылгазының төвү шупту кирген дыңнадыгларны болгаш дилеглерни чыып, чаңгыс аайлаш, сайгарып көөрүн Владислав Ховалыг дыңнаткан.
Республиканың чурттакчылары Тыва Республиканың Баштыңы-биле дорт шугумче айтырыгларын тускай сервистер таварыштыр чорударын сагындыраал:
- күрүне ачы-дузалары порталда удур харылзаа шөлүнүң бо айтыында (pos.gosuslugi.ru/lkp/direct...)
- тускай чат-бот дузазы-биле (forms.yandex.ru/u/68feecd7...).
Регион башкарылгазының төвүнүң медээзи-биле алырга, айыттынган сервистер таваыштыр дыңнадыгларны чыып эгелээнден бээр 100 ажыг айтырыг кирген. Транспорт инфраструктуразын, чуртталга тудуун хөгжүдериниң, корум-чурум тударының айтырыглары, хамаатыларның чиигелделиг бөлүктеринге күрүне деткимчезиниң хемчеглерин көргүзериниң айтырыглары хөйү-биле кирген.
Эрткен чылын Тываның Баштыңы Владислав Ховалыгның дорт шугумунче чурттакчылардан 500 хире айтырыглар кирген, оларның көвей кезии – 370 хирези дорт дамчыдылга эгелээринге чедир аңгы-аңгы каналдар таварыштыр келген. Республиканың удуртукчузу ийи шак үргүлчүлээн дамчыдылгада эң-не чидиг айтырыгларга харыыларны берген.